महाविकास आघाडीचे मतदारांसमवेत मॉर्निंग वॉक

| पनवेल | प्रतिनिधी |

मावळ लोकसभा मतदारसंघांमध्ये प्रचार शिगेला पोहोचला आहे. विद्यमान खासदारांच्या निष्क्रियपणाबद्दल नाराजीचा सूर हा यत्र तत्र सर्वत्र असा उमटत आहे. आता हवा खासदार नवा! अशी जनभावना मावळ लोकसभा मतदारसंघात उमटत आहे. मंगळवार, (दि.7) मे रोजी याचाच प्रत्यय पुन्हा एकदा आला. शेतकरी कामगार पक्षाचे माजी आमदार बाळाराम पाटील यांच्या नेतृत्वाखाली महाविकास आघाडीच्या नेत्यांनी मॉर्निंग वॉक करत मतदारांशी संवाद साधला. महाविकास आघाडीचे अधिकृत व लोकप्रिय उमेदवार संजोग वाघेरे पाटील यांच्या समोरील मशालीचे बटण दाबून त्यांना प्रचंड मतांनी विजयी करा, असे आवाहन मतदारांना करत असताना एकूणच विद्यमान खासदारांबद्दलची नाराजी चव्हाट्यावर आली.

महाविकास आघाडीच्या नेत्यांनी मंगळवारी प्रचारासाठी एक अनोखी क्लृप्ती वापरली. सकाळी लवकर उठून चालायला येणार्‍या मतदारांशी संवाद साधताना महाविकास आघाडीच्या नेत्यांना सुंदर प्रतिसाद मिळाला. संजोग वाघेरे पाटील यांच्या रूपाने नवा खासदार आणि जनतेची काम करणारा खासदार आम्हाला मिळेल अशी जनभावना येथे उमटून आली.

वडाळे तलाव हा पनवेलच्या शिरपेचातील मुकुटमणी समजला जातो. फार मोठ्या संख्येने या ठिकाणी नागरिक सकाळी चालण्यासाठी येतात. विशेष म्हणजे यामध्ये समाजाच्या सर्व स्तरांतील नागरिकांचा समावेश असतो. आबालवृद्ध, महिला, तरुणाई यांची येथे रेलचेल असते. या सार्‍यांशी महाविकास आघाडीच्या नेत्यांनी मोकळा ढाकळा संवाद साधला. यावेळी माजी आमदार बाळाराम पाटील यांच्यासमवेत पनवेल महानगरपालिकेचे माजी विरोधी पक्षनेते प्रीतम म्हात्रे, शेतकरी कामगार पक्षाचे पनवेल शहर जिल्हा चिटणीस गणेश कडू, पनवेल शहर चिटणीस नंदू भोईर, शेकाप पनवेल शहर जिल्हा महिला आघाडी अध्यक्ष अनुराधा ठोकळ,माजी नगरसेविका प्रीती म्हात्रे जॉर्ज, ज्येष्ठ नागरिक संघाच्या उपाध्यक्षा माधुरी गोसावी,शिवसेना पनवेल शहर प्रमुख प्रवीण जाधव, बाबू जाधव जॉन्सन जॉर्ज मंगेश अपराज, बी.पी. म्हात्रे, डी.बी. म्हात्रे, कविता ठाकूर, वैभव जोशी आदींची उपस्थिती होती.