महेंद्र थोरवे टोरंटच्या दावणीला; सुधाकर घारे यांचा घणाघात

| अलिबाग | प्रतिनिधी |

कर्जतच्या जंगलात टोरंट पॉवर कंपनीच्या प्रकल्पापूर्वीही दरवर्षी एक लाख वृक्षतोड होते, असा दावा आमदार महेंद्र थोरवे यांनी केल्याची चर्चा सोशल मीडियावर सुरू आहे. मात्र, या दाव्याला कोणताही अधिकृत दुजोरा मिळालेला नसताना टोरंट प्रकल्पाच्या समर्थनासाठी थोरवेंची धडपड सुरू असल्याचा आरोप होत आहे. एकीकडे सायडोंगर, कोतवाल आणि पाली या तीन गावांतील जंगलात टोरंटच्या 3 हजार मेगावॅटच्या पंप स्टोरेज प्रकल्पासाठी 32 हजार 490 झाडे तोडण्याचा आकडा समोर असताना प्रत्यक्षात तीन लाख झाडांवर कुऱ्हाड येण्याची भीती व्यक्त केली जात आहे. मात्र, या वृक्षतोडीच्या गंभीर प्रश्नाकडे दुर्लक्ष करून थोरवेंना राष्ट्रवादी काँग्रेसवर टोलेबाजी करण्यातच अधिक रस असल्याचा आरोप राष्ट्रवादीचे नेते सुधाकर घारे यांनी केला आहे.

कोणत्याही अधिकृत पुराव्याशिवाय जंगलात दरवर्षी एक लाख झाडे तोडली जातात, असे वक्तव्य करून थोरवे विरोधकांवर टोलेबाजी करतात. दुसरीकडे तीन लाख झाडे तोडली जाण्याची शक्यता असलेल्या टोरंट प्रकल्पाचे उघडपणे समर्थन करतात. हा प्रकल्प केंद्र आणि राज्य सरकारने सर्व नियम पाळून मंजूर केला आहे. हा ग्रीन एनर्जी प्रकल्प असून, यातून आदिवासी युवकांना रोजगार मिळणार आहे. त्यामुळे हा प्रकल्प झालाच पाहिजे, अशी भूमिका आमदार महेंद्र थोरवे यांनी मांडली आहे.

थोरवेंचा घारेंवरही निशाणा
राष्ट्रवादी काँग्रेसने टोरंट प्रकल्पाला विरोध केल्यानंतर आमदार महेंद्र थोरवे यांनी खासदार सुनील तटकरे यांच्यावर पलटवार केला. सत्तेत राहून सरकारच्याच निर्णयाला विरोध करणे योग्य नाही. केंद्र आणि राज्य सरकारने मंजूर केलेला प्रकल्प नको असेल, तर राष्ट्रवादी काँग्रेसने महायुतीतून बाहेर पडावे, असे वक्तव्य थोरवे यांनी केले. 

प्रसिद्धीसाठी तटकरे आणि घारेंच्या नावाचा जप?
खासदार सुनील तटकरे आणि सुधाकर घारे यांचे नाव घेतल्याशिवाय महेंद्र थोरवेंचा दिवस जात नाही. आमचे नाव घेऊन त्यांना प्रसिद्धी मिळते. त्यामुळे प्रसिद्धीसाठी ते सतत तटकरे आणि घारे या दोन नावांचा जप करत असतात, असे वक्तव्य राष्ट्रवादी काँग्रेसचे नेते सुधाकर घारे यांनी केले.