तळोज्यात ड्रग्जविरोधी कारवाईचा मोठा धक्का

29 ग्रॅम गांजासह लाखोंचा मुद्देमाल जप्त

| पनवेल | विशेष प्रतिनिधी |

नवी मुंबई पोलिसांच्या अमली पदार्थविरोधी पथकाने तळोजा परिसरातील ओम साई रेसिडेन्सी लॉजवर धडक कारवाई केली. या कारवाईत लॉजवर अमली पदार्थांच्या व्यवहारात सहभागी असल्याच्या संशयावरून एका युगुलाला अटक करण्यात आली. तसेच, 29 ग्रॅम गांजा व चार मोबाईल फोन असा एकूण 1 लाख 2 हजार रुपयांचा मुद्देमाल जप्त करण्यात आला असून, या प्रकरणामुळे परिसरात खळबळ उडाली आहे.

प्राथमिक तपासात अटक करण्यात आलेली महिला मूळची पंजाब येथील असल्याचे समोर आले आहे. पंजाबमधून नवी मुंबईत गांजाची वाहतूक करणाऱ्या साखळीशी तिचा संबंध असल्याचा संशय पोलिसांनी व्यक्त केला आहे. त्यामुळे या प्रकरणामागे आंतरराज्यीय अमली पदार्थ तस्करीचे जाळे कार्यरत असल्याची शक्यता गृहीत धरून तपासाची व्याप्ती वाढविण्यात आली आहे. या रॅकेटशी संबंधित इतर संशयितांचा शोध सुरू असून, अमली पदार्थांचा पुरवठा करणाऱ्या संपूर्ण साखळीचा पर्दाफाश करण्यासाठी अमली पदार्थविरोधी पथक सखोल तपास करत आहे.