| पनवेल | प्रतिनिधी |
‘व्हॅलेंटाईन डे’मुळे फेब्रुवारी महिना प्रेमीयुगुलांसाठी खास असतो. बाजारपेठाही ‘व्हॅलेंटाईन डे’साठी सज्ज झाल्या आहेत. रंगीबेरंगी फुले, ग्रीटिंग कार्ड, गिफ्ट, कपड्यांच्या दुकानांसह विविध वस्तुंनी बाजारपेठाही फुलल्या आहेत. शहरातील महाविद्यालयांचे कट्टे, कॉफी हाऊसेस, मॉलमध्ये सर्वत्र गुलाबी वातावरण निर्माण झाले आहे. अनेकजण 14 फेब्रुवारीच्या तयारीमध्ये मग्न आहेत.
धावपळीच्या आयुष्यात भावना व्यक्त करण्याचे निमित्त या दिवसामुळे मिळते, असे काही दाम्पत्यांनी सांगितले. काही वर्षांपासून केवळ तरुणाईच्या वलयातच व्हॅलेंंटाईनला गुरफटून ठेवले आहे.अनेकजणांनी व्हॅलेंटाईन पार्टी, गेट टूगेदर असे कार्यक्रमाचेही आयोजन करण्यात आले आहे. अनेक हॉटेल्स, रेस्टॉरंटने व्हॅलेंटाइन कपलसाठी खास कॅण्डल लाइट डिनरच्या ऑफर्सही दिल्या आहेत.
व्हॅलेंटाइन डे ला प्रेमी युगुलांमध्ये आपल्या जोडीदाराला भेट वस्तू देण्याची पद्धत आहे. यासाठी प्रेमी जोडपे लाल रंगातील भेटवस्तू देतात. कारण लाल रंग हा प्रेमाचा, समृद्धीचा, सौभाग्याचा रंग मानला जातो. त्यामुळे बाजारातही लाल रंगाशी निगडित विविध प्रकारच्या भेटवस्तू, कपडे, वॉलेट दाखल झाले आहेत.
या वस्तूंना मागणी
तरुणाईला भुरळ घालण्यासाठी बाजारपेठा अनेक वस्तुंनी बहरल्या आहेत. प्रेम व्यक्त करताना गुलाबाचा अधिक वापर होतो. टेडी बेअर, फोटो फ्रेम, ग्रिटिंग, कॉफी मग, व्हॅलेंटाईन स्टिकर्स, एकमेकांच्या नावाचे ब्रेसलेट, आदी विविध भेटवस्तुंनी बाजारपेठा सजल्या आहेत. तसेच म्युझिकल कपल टेडी, टेडी विथ मॅसेज बॉटल, कुशन्स विलमॅच, किचन टेडी विथ हार्ट, लव मेसेज फोटो फ्रेम, मेसेज बॉक्स, म्युझिकल ग्रिटिंग, हँगिंग हार्ट, याशिवाय लव डायरीज, मॅसेज बॉक्स, लव मॅझिक कार्ड, कपल शोपीस अशा असंख्य वस्तुंनी बाजारपेठा सजल्या आहेत.
दिवस अविस्मरणीय करण्यासाठी केक कापला जातो. हृदयाच्या आकाराच्या चॉकलेट केकला या दिवशी खूप मागणी असते. कॉलेजीयन्स प्रेमवीरांची पसंती असल्याने काहींनी आगाऊ बुकिंग केले आहे. – नमिता पाटील, केक विक्रेते, पनवेल