। नेरळ । प्रतिनिधी ।
नेरळ-कशेळे राज्य मार्गावरील अंजप गावाशेजारी असलेल्या स्पेस वर्ल्ड या घरकुल प्रकल्पाच्या बुकिंग कार्यालयाला अचानक आग लागल्याची घटना दुपारच्या सुमारास घडली. या आगीत कार्यालय पूर्णतः जळून खाक झाले असून सुदैवाने कोणतीही जीवितहानी झालेली नाही.
मिळालेल्या माहितीनुसार, आग लागली तेव्हा कार्यालय बंद अवस्थेत होते. त्यामुळे आत कोणतीही व्यक्ती नसल्याने मोठी दुर्घटना टळली. आगीचे नेमके कारण अद्याप समजू शकलेले नाही. दरम्यान, आगीने परिसरातील गवत व वनसंपदेलाही वेढा घातल्याने काही काळ भीतीचे वातावरण निर्माण झाले होते. स्थानिक ग्रामस्थांनी तात्काळ पुढाकार घेत आग विझविण्याचा प्रयत्न केला. या घटनेची माहिती मिळताच नेरळ पोलीस ठाण्याचे अधिकारी घटनास्थळी दाखल झाले असून, पंचनामा करण्यात आला आहे. तसेच सदर गृहप्रकल्पाच्या मालकालाही घटनेची माहिती देण्यात आली आहे. या घटनेमुळे परिसरात एकच खळबळ उडाली असून आगीच्या कारणाचा तपास सुरू आहे.
स्पेस वर्ल्ड प्रकल्पाच्या बुकिंग ऑफिसला भीषण आग
