समृद्धी महामार्गावर ट्रॅव्हल्स बसला भीषण आग

। नागपूर । प्रतिनिधी ।

मेहकर तालुक्यालगत असलेल्या समृद्धी महामार्गावर मंगळवारी (दि. 6) पहाटेच्या सुमारास एक अपघात झाला आहे. सुदैवाने यात जिवीतहानी झालेली नाही. मुंबई कॉरिडोरवरील चॅनल क्रमांक 300.1 येथे नागपूरहून नाशिककडे जाणाऱ्या एका ट्रॅव्हल्स वाहनाला शॉर्ट सर्किटमुळे अचानक आग लागली. सुदैवाने या अपघातात कोणतीही जीवितहानी अथवा दुखापत झाली नाही.

मलकापूर पोलीस केंद्र अंतर्गत समृद्धी महामार्ग उपकेंद्र दुसरबीड येथे रात्रगस्त पेट्रोलिंग सुरू असताना सीआरओ संभाजीनगर यांनी दूरध्वनीद्वारे माहिती दिली की, चॅनल क्रमांक 300.1 (मुंबई कॉरिडोर) येथे एका ट्रॅव्हल्स बसला आग लागली आहे. ही माहिती मिळताच सहाय्यक पोलीस निरीक्षक संदीप इंगळे तसेच एम.एस.एफ.चे दोन जवान तातडीने घटनास्थळी रवाना झाले. घटनास्थळी पोहोचल्यानंतर खुराणा ट्रॅव्हल्स बस रस्त्याच्या कडेला जळत असल्याचे दिसून आले. ट्रॅव्हल्स बसचे चालक वाहिद शेख (36) रा. नागपूर यांच्याकडे चौकशी केली असता त्यांनी सांगितले की ट्रॅव्हल्स बसच्या वायरिंगमध्ये शॉर्ट सर्किट होऊन अचानक आग लागली. ही ट्रॅव्हल्स बस नागपूरहून नाशिककडे जात होती. वाहनामध्ये एकूण 36 प्रवासी प्रवास करत होते.

आग लागल्याची बाब लक्षात येताच चालक व कर्मचाऱ्यांनी प्रसंगावधान राखून सर्व प्रवाशांना तात्काळ सुरक्षितरित्या बाहेर काढले. कोणालाही कोणतीही दुखापत झाली नाही. त्यानंतर घटनास्थळी अग्निशमन दलाचे वाहन बोलावून आगीवर नियंत्रण मिळवण्यात आले. अपघातानंतर प्रवाशांची गैरसोय होऊ नये म्हणून त्यांना सरकारी वाहनाद्वारे दुसरबीड टोलनाक्यावर सुरक्षितरीत्या सोडण्यात आले. अपघातग्रस्त ट्रॅव्हल्स रस्त्याच्या बाजूला हलवण्यात आल्याने समृद्धी महामार्गावरील वाहतूक सुरळीत सुरू होती. ही घटना मेहकरजवळील शिवणी पिसा गावालगत समृद्धी महामार्गावर घडली असून, वेळेवर मदतकार्य व पोलीस प्रशासनाच्या तत्परतेमुळे मोठी दुर्घटना टळली.