आर्थिक मॉडेलिंगसाठी सल्लागार सेवा नियुक्तीसाठी काढल्या निविदा
| चिरनेर | प्रतिनिधी |
गोरगरिबांच्या कवडीमोल भावाने संपादन केलेल्या जमिनी बड्या भांडवलदारांना विकून कोट्यवधींचा नफा कमाविणाऱ्या सिडकोची वक्रदृष्टी आता जागतिक किर्तीच्या एलिफंटा बेटावर वळली आहे. एलिफंटा व न्हावा बेटावर पर्यटनासाठी मास्टर प्लॅनिंग आणि आर्थिक मॉडेलिंगसाठी सल्लागार सेवा नियुक्ती करण्यासाठी सिडकोने निविदा मागविल्या आहेत. यामुळे सर्वच ठिकाणी घोळ घालणाऱ्या सिडकोच्या या निर्णयामुळे स्थानिक ग्रामस्थ व परिसरातील व्यावसायिकांच्या भुवया उंचावल्या आहेत.
एलिफंटा बेटाला जागतिक वारसा लाभलेला आहे. अशा या वर्ल्ड हेरिटेजचा दर्जा असलेल्या एलिफंटा बेटाचा आणि पर्यटकांच्या विकासासाठी पुरातत्व पुरातन विभाग, महाराष्ट्र पर्यटन विकास महामंडळ, आयटीडीसी, बंदर विभाग, एनजीओ, स्थानिक ग्रामपंचायत आणि इतर विविध शासकीय विभागाच्या माध्यमातून सर्वोतोपरी प्रयत्न केले जात आहेत. त्यामुळे थोड्या फार प्रमाणात एलिफंटा बेटाचा विकास आणि पर्यटकांना भेडसावणाऱ्या विविध समस्या, गैरसोयी दूर करण्यात यश आले आहे. एलिफंटा बेट चार किमी चौरस किलोमीटर क्षेत्रात विसावले आहेत. यामध्ये सर्वाधिक जमिनीचे क्षेत्र वन विभागाच्या अखत्यारित येत आहे. तर पुरातत्व, नौदल, बंदर विभाग आणि स्थानिक शेतकऱ्यांच्या मालकीचेही काही क्षेत्र आहे.
आता जागतिक किर्तीच्या एलिफंटा बेटावर सिडकोने वक्रदृष्टी वळविली आहे. वूई मेक सिटीजचा दावा करणाऱ्या सिडकोने याआधीच नवी मुंबई परिसरात दुसऱ्या मुंबईची निर्मिती केली आहे. यासाठी सिडकोने येथील शेतकरी, प्रकल्पग्रस्तांच्या जमिनी कवडीमोल भावाने संपादन केल्या आहेत. यासाठी सिडकोने शेतकरी, प्रकल्पग्रस्तांच्या जमिनी संपादन करताना वारेमाप आश्वासने दिली होती. मात्र, दिलेल्या आश्वासनांची पूर्तता करण्यात सिडको सपशेल अपयशी ठरली आहे. उलट कवडीमोल भावाने संपादन केलेल्या जमिनी बड्या भांडवलदारांच्या घशात घालीत कोट्यवधींचा नफा कमावला आहे. सिडकोची वक्रदृष्टी आता वर्ल्ड हेरिटेजचा दर्जा असलेल्या एलिफंटा बेटाकडे वळल्याने अशीच स्थिती स्थानिक रहिवाशांवर येण्याची साधारण भीती ग्रामस्थ , व्यावसायिकांकडून व्यक्त केली जात आहे.
राष्ट्रीय, आंतरराष्ट्रीय स्तरावर काम करणाऱ्या सल्लागार सेवा देणाऱ्या अनुभवी कंपन्यांकडून निविदा मागविण्यात आलेल्या आहेत. त्यानंतर पर्यटन, पर्यटकांसाठी विकास मॉडेल व आर्थिक मॉडेलिंगसाठी सल्लागार सेवा नियुक्ती करण्यात येणार आहे. सल्लागार एजन्सीच्या सल्ल्यानुसारच एलिफंटा व न्हावा बेटावर विकास कामांची दिशा ठरवली जाईल, अशी माहिती सिडकोचे असो. प्लॅनिंग विभागाचे अधिकारी प्रियदर्शन वाघमारे यांनी दिली.