उद्यापासून माथेरान बंद

माथेरान पर्यटन बचावासाठी प्रशासनाकडून असहकार

| नेरळ | प्रतिनिधी |

माथेरान शहरात येणार्‍या पर्यटकांची होणारी फसवणूक पर्यटकांची आर्थिक लूटमार थांबावी म्हणून प्रशासनाने कडक पावले उचलावीत यासाठी माथेरान पर्यटन बचाव समिती प्रशासनाकडून कार्यवाहीची अपेक्षा करीत होती. मात्र, त्याबाबत माथेरान पर्यटन बचाव समितीला प्रशासन सहकार्य करीत नसल्याचे दिसून आल्याने शेवटी माथेरान बंद ठेवण्याचा निर्णय घेण्यात आला आहे. दरम्यान, उद्या 18 मार्चपासून माथेरान बंद सुरू होणार असून, या काळात माथेरानमधील सर्व व्यवसाय बंद असतील असे जाहीर करण्यात आले आहे.

माथेरान पर्यटन बचाव समितीकडून माथेरान शहरातील प्रवेशद्वार येथे असलेले एजंट यांच्याकडून पर्यटकांची फसवणूक केली जाते. त्यात माथेरान शहराची चुकीची माहिती देणे, पर्यटकांची आर्थिक फसवणूक करणे आदी प्रकार घडत असून, माथेरान शहरात येणार्‍या पर्यटकांना सुखरूप प्रवास करता यावा, कोणत्याही अडथळ्याविना पर्यटन करता यावे, यासाठी शासनाने आवश्यक ठिकाणी सीसीटीव्ही कॅमेरे, दरपत्रक, माहिती केंद्र असावीत आणि माथेरानची बदनामी करणार्‍या लोकांवर कारवाई व्हावी, अशी मागणी माथेरान पर्यटन बचाव समितीची होती. त्यानुसार माथेरान पर्यटन बचाव समिती गेली महिनाभर प्रशासनासोबत चर्चा करीत होती. त्यात माथेरान पर्यटन बचाव समिती आणि प्रशासन यांच्यात दोन बैठका झाल्या होत्या. शहराची बदनामी करून पर्यटकांची दिशाभूल करणार्‍यांवर कारवाई करावी अन्यथा 18 मार्चपासून माथेरान हे पर्यटनस्थळ बेमुदत बंद ठेवले जाईल, असे जाहीर करण्यात आले होते. त्यासाठी प्रशासनाने पर्यटन बचाव समितीसोबत सोमवारी 17 मार्च रोजी बैठक आयोजित केली होती.

त्या बैठकीत प्रशासनाकडून माथेरानचे महसूल अधीक्षक अभयसिंह ठाकूर, पोलीस अधिकारी अनिल सोनोने, वन अधिकारी उमेश जंगम आणि पालिका मुख्याधिकारी यांचे प्रतिनिधी उपस्थित होते. त्यावेळी माथेरान पर्यटन बचाव समितीकडून सर्व राजकीय पक्षांचे प्रतिनिधी आणि व्यापारी तसेच स्थानिक नागरिक उपस्थित होते. मागील महिनाभरात प्रशासनाच्यावतीने कोणत्याही प्रकारची कार्यवाही शहरात येणारे पर्यटक यांची बदनामी करणारे यांची झालेली नाही. त्याचवेळी बहुसंख्य ठिकाणी बंद असलेले सीसीटीव्ही कॅमेरे बंदच आहेत. तर बदनामी होत असलेल्या दस्तुरी प्रवेशद्वार येथे पोलिसांनी कोणावरही कारवाई केली नाही. वन जमिनीमध्ये घोडे बांधले जात असून, त्यामुळे झाडे तुटली जात असताना वन विभाग शांत आहे. पार्किंग हद्दीत प्रवासी घोडे नेण्याचे बंद झालेले नाही आणि पालिकेने घोडे, हातरिक्षा, हमाल यांची दरपत्रक निश्‍चित केलेले फलक लावले नाहीत. यामुळे पर्यटन बचाव समिती संतप्त झाली असून, माथेरानमधील प्रशासनाला शहराचे पर्यटन वाचावे यासाठी कोणत्याही प्रकारची काळजी नसल्याचे दिसून येत असल्याने उद्यापासून माथेरान बंद ठेवण्यात येणार असल्याचे निर्णय माथेरान पर्यटन बचाव समितीने घेतला.

असा असेल बंद
माथेरान बंद काळात कोणतेही व्यवहार सुरू असणार नाहीत. पर्यटकांनी आपली गैरसोय होईल त्यासाठी आधी माहिती घेऊन माथेरान येण्याचे नियोजन करावे. उद्या 18 मार्च रोजी सकाळी 11 वाजता सर्व नागरिक, व्यापारी यांनी एकत्र जमायचे असून, श्रीराम चौकात सर्वांची बैठक होईल आणि पुढील निर्णय होतील.

दस्तुरी प्रवेशद्वार येथे एजंट लोकांकडून जाणीवपूर्वक माथेरानची चुकीची माहिती दिली जात आहे. त्यामुळे पर्यटक अर्ध्या दिवसांनी घरी परतण्यास निघतो, त्यामागे काही षड्यंत्र आहे काय, असा संशय येत असून, माथेरानमध्ये कोणत्याही प्रकारची शेती नसल्याने येथील पर्यटन बहरावे यासाठी आमचा प्रयत्न सुरू आहे.

अजय सावंत,
माजी नगराध्यक्ष, सभापती, माथेरान नागरी पतसंस्था