वीस हजार सीड बॉलची लागवड

पाच शाळांनी एकत्र येत दिला वृक्षसंवर्धनाचा संदेश

| माणगाव | प्रतिनिधी |

रायगड जिल्ह्यातील पाच शाळांनी एकत्र येत पर्यावरण संवर्धनासाठी 20 हजार सीड बॉलची लागवड करून एक प्रेरणादायी उपक्रम यशस्वीपणे राबविला. छत्रपती शिक्षण मंडळ, कल्याण संचलित माध्यमिक विद्यामंदिर रातवड, जय जवान जय किसान विद्यालय वाघेरी, अभिनव ज्ञानमंदिर खुर्द, सरस्वती विद्यामंदिर वडघर मुद्रे आणि गोळेगणी हायस्कूल या पाच शाळांनी संयुक्तपणे हा उपक्रम राबवून हरित रायगडच्या संकल्पनेला बळ दिले.

हा उपक्रम माय ग्रीन सोसायटी, अंधेरी व वनविभाग, महाराष्ट्र शासन यांच्या सहकार्याने पार पडला. वृक्षसंवर्धनाचा संदेश समाजापर्यंत पोहोचविणे, जैवविविधतेचे संरक्षण करणे आणि विद्यार्थ्यांमध्ये पर्यावरणाबाबत जागरूकता निर्माण करणे हा या उपक्रमाचा मुख्य उद्देश होता.

या अभियानात रायगड जिल्ह्यातील सर्व सहभागी शाळांचे मुख्याध्यापक, शिक्षक, शिक्षकेत्तर कर्मचारी, विद्यार्थी व पालक यांनी उत्स्फूर्त सहभाग नोंदविला. सर्वांच्या सामूहिक प्रयत्नातून विविध परिसरात 20 हजार सीड बॉलचे रोपण करण्यात आले. येत्या पावसाळ्यात या सीड बॉलमधून हजारो वृक्ष उगवून परिसर अधिक हिरवागार होण्यास मदत होणार आहे.

पर्यावरण रक्षण ही काळाची गरज असून, विद्यार्थ्यांच्या सहभागातून राबविण्यात आलेला हा उपक्रम समाजासाठी निश्चितच प्रेरणादायी ठरणार आहे. ‘आजचा सीड बॉल म्हणजे उद्याचा विशाल वृक्ष’ हा संदेश देत सहभागी शाळांनी पर्यावरण संवर्धनाची सामाजिक जबाबदारी पार पाडली.