नेरळ-माथेरान प्रवासी वाहतुकीची प्रतीक्षा कायम
| नेरळ | प्रतिनिधी |
जगभरातील पर्यटकांची लाडकी मिनीट्रेन नेरळ स्थानकातून माथेरानसाठी अद्याप सुरु झालेली नाही. दरवर्षी 15 ऑक्टोबर रोजी मिनीट्रेनची नेरळ-माथेरान-नेरळ प्रवासी वाहतूक सुरु होते. यावर्षी या मार्गावरील नॅरोगेज मार्गावर दरडी कोसळल्याने दुरुस्तीची कामे सुरु होती. मात्र, आता नेरळ येथून माथेरानसाठी मालवाहू गाडी कोणत्याही अडथळ्याविना प्रवास केला. दरम्यान, नॅरोगेज मार्ग प्रवासी वाहतूक करण्यासाठी तयार झाला असल्याने मिनीट्रेन कधी सुरु होणार याबाबत मध्य रेल्वेकडून कधी निर्णय घेतला जाणार, याकडे सर्वांचे लक्ष लागून राहिले आहे.
मिनीट्रेन दरवर्षी पावसाळ्यातील चार महिने बंद ठेवली जाते. ब्रिटिश काळापासून 15 जून ते 15 ऑक्टोबर या कालावधीत मिनीट्रेन पावसाळी सुट्टीवर जाते. नेरळ-माथेरान हा मार्ग पहाडी असल्याने पावसाळ्यात नॅरोगेज मार्गावर दरडी कोसळून अपघात होण्याची शक्यता असल्याने मिनीट्रेनची प्रवासी वाहतूक बंद केली जाते. यावर्षी मे महिन्यात पाऊस आला आणि 26 मेपासून प्रवासीसेवा बंद केली. त्यामुळे 15 जूनपर्यंत मिनीट्रेनमधून प्रवास करण्याचे नियोजन करणाऱ्या पर्यटकांची संधी हुकली आहे. दुसरीकडे 15 ऑक्टोबर रोजी पावसाळी सुट्टी संपवून मिनीट्रेनची प्रवासी वाहतूक सुरु होते. मात्र, यावर्षी ऑक्टोबर महिना संपला तरी मिनीट्रेनची प्रवासी वाहतूक सुरु झालेली नाही. मोसमी पशु अजून परतीच्या मार्गावर नसल्याने दररोज पाऊस सुरु असून, नॅरोगेज मार्गावर दगड कोसळण्याच्या घटना कायम आहेत. त्यामुळे अद्याप मिनीट्रेन सुरु झालेली नाही.
दरम्यान, नेरळ-माथेरान मार्गावर मालवाहू गाडी कोणत्याही अडथळ्याविना नेरळ येथून माथेरानला पोहोचली आहे. त्याचवेळी माथेरान येथून नेरळ अशीदेखील पोहोचली आहे. मालवाहू गाडी 28 ऑक्टोबर रोजी नेरळ येथून माथेरानसाठी निघाल्यावर या गाडीला श्रीफळ वाढवून सुरुवात केली. ही मालवाहू गाडी कोणत्याही अडथळ्याविना निर्धारित वेळेत पोहोचली होती. त्यानंतर नॅरोगेज मार्ग प्रवासी वाहतुकीसाठी तयार आहे, असा सिग्नल देण्यात आला आहे. त्यानंतर माथेरान गेलेली मिनीट्रेनची मालवाहू गाडी आज 31 ऑक्टोबर रोजी नेरळ येथे परत आली आहे. त्यामुळे नेरळ-माथेरान-नेरळ अशी प्रवासी वाहतूक सुरु करण्याची घोषणा मध्य रेल्वे कधी करणार याकडे पर्यटक प्रवाशांचे लक्ष लागून राहिले आहे. मध्य रेल्वेकडून मिनीट्रेनची घोषणा कधी होते याकडे पर्यटकांचे लक्ष लागले असून, हिवाळ्यात मिनीट्रेनमधून प्रवास करता येणार का? याची वाट पर्यटक पाहात आहेत.
गाड्यांची संख्या वाढवा
नेरळ-माथेरान-नेरळ मार्गावर मागील दोन वर्षांपासून नेरळ येथून दोन आणि माथेरान येथून दोन अशा दोन फेऱ्या सुरु आहेत. मात्र, नेरळ येथून सकाळी लवकर आणि रात्री वस्तीसाठी एक अशा दोन गाड्यादेखील सुरु करण्याची मागणी गेली अनेक वर्षे केली जात आहे.