सभागृहात विचारला जाब
। अलिबाग । विशेष प्रतिनिधी ।
अलिबाग येथील जिल्हा सामान्य रुग्णालयात प्रसूती कक्षात अपुर्या बेडमुळे गर्भवती महिलांना जमिनीवर उपचार करुन घ्यावे लागत असल्याचे वृत्त कृषीवलने प्रसिद्ध केले होते. या वृत्ताची दखल घेत शेकापक्षाचे सरचिटणीस आमदार जयंत पाटील यांच्यासह आमदार अॅड. निरंजन डावखरे, प्रविण दरेकर, प्रसाद लाड, डॉ. परिणय फुके, डॉ.रणजित पाटील यांनी विधान परिषदेत प्रश्न उपस्थित करीत सरकारला धारेवर धरले. त्यावर सार्वजनिक आरोग्य व कुटुंब कल्याण मंत्री राजेश टोपे यांनी उत्तर देताना रुग्णांना असुविधा होऊ नये याकरिता 100 विद्यार्थी प्रवेश क्षमतेचे शासकीय महाविद्यालय व संलग्नीत 500 रुग्ण खाटांचे व रुग्णालय सुरु करण्याबाबत मान्यता दिली असल्याचे स्पष्टिकरण दिले.
अलिबाग येथील जिल्हा रुग्णालयात ग्रामीण भागासह इतर भागातून अनेक प्रकारच्या आजाराने ग्रस्त असलेले सामान्य व गरीब रुग्ण उपचार घेण्यासाठी येत असतात. सदर रुग्णालयातील प्रसूती कक्षात 42 बेड असून अपुर्या बेडमुळे गर्भवती महिलांना जमिनीवर उपचार करुन घ्यावे लागत असल्याचे माहे जानेवारी, 2022 मध्ये वा त्यादरम्यान निदर्शनास आले असल्याचे आमदारांनी सांगितले. सदर रुग्णालयात रुग्णांची संख्या दिवसेंदिवस वाढत असून, अत्याधुनिक सोयी-सुविधा नसल्यामुळे अनेक गंभीर स्वरूपाच्या अथवा अपघातात जखमी झालेल्या रुग्णांना मुंबई येथील शासकीय रुग्णालयात अथवा खाजगी रुग्णालयात पुढील उपचारासाठी घेऊन जावे लागते. जिल्हा रुग्णालय, अलिबाग येथे उपलब्ध असलेल्या जागेमध्ये नवीन अत्याधुनिक सोयी-सुविधांयुक्त रुग्णालय बांधण्याची गरज निर्माण झाली असल्याचे जयंत पाटील यांनी सांगितले. त्यामुळे अशी परिस्थिती उद्भवून नये याकरिता अलिबाग येथील जिल्हा रुग्णालयातील प्रसूती कक्षात बेडची संख्या वाढविण्यासह अत्याधुनिक सोयी-सुविधा उपलब्ध करुन देण्याबाबत तसेच रुग्णालयाच्या उपलब्ध जागेवर अत्याधुनिक सुपर स्पेशालिटी रुग्णालय बांधण्याबाबत शासनाने कोणती कार्यवाही केली असा प्रश्न उपस्थित केला.
या प्रश्नावर उत्तर देताना सार्वजनिक आरोग्य व कुटुंब कल्याण मंत्री राजेश टोपे यांनी सांगितले की, जिल्हा रुग्णालय रायगड अलिबाग हे 200 खाटांचे व 76 विशेष उपचार कक्ष असे एकूण 276 खाटांचे रुग्णालय कार्यान्वित आहे. अपूर्या खाटांमुळे गर्भवती महिलांना जमिनीवर उपचार करुन घ्यावे लागत नाहीत. जिल्हा रुग्णालय, अलिबाग येथे उपलब्ध तज्ञांनुसार सेवा उपलब्ध करुन देण्यात येतात आणि आवश्यकता असल्यास अतिगंभीर रुग्णांना शासकीय वैद्यकीय महाविद्यालयात संदर्भीत करण्यात येते तसेच जिल्हा रुग्णालय, अलिबाग येथे द्वितीय स्तरावरील सुविधा उपलब्ध आहेत. वैद्यकीय शिक्षण व औषधी द्रव्ये विभागाच्या दिनांक 31 जानेवारी, 2012 च्या शासन निर्णयान्वये अलिबाग, जिल्हा रायगड येथे 100 विद्यार्थी प्रवेश क्षमतेचे शासकीय महाविद्यालय व संलग्नीत 500 रुग्ण खाटांचे व रुग्णालय सुरु करण्याबाबत मान्यता दिली असल्याचेही स्पष्ट केले.