आमदार भरत गोगावले यांची एसटी महामंडळाच्या अध्यक्षपदावर बोळवण ?
| रायगड | खास प्रतिनिधी |
शिंदे गटात सुरुवातीपासून महाडचे आमदार भरत गोगावले यांना मंत्रिपदाचे प्रबळ दावेदार मानले जात होते. मंत्री मंडळ विस्ताराच्या वेळी कोठेना कोठे माशी शिंकत असल्याने त्यांना मंत्रिपदाने हुलकावणी दिली आहे. आता मात्रा, त्यांना एसटी महामंडळाचे अध्यक्षपदी दिले जाण्याची शक्यता सूत्रांनी व्यक्त केली. तसे झाल्यास काही घटीकांपुरतचे ते या पदावर राहण्याची शक्यता आहे. कारण निवडणूका जाहीर होताच त्यांना या पदावरुन पाय उतार व्हावे लागणार आहे. तुर्तास त्यांच्या नवीन कोटाची घडी मोडण्याची संधी त्यानिमीत्ताने त्यांना मिळणार असल्याचे बोलले जाते. आमदार गोगावले हे कॅबिनेट दर्जाचे पद स्विकारणार की सोडणार हे पाहणे औत्सुक्याचे ठरणार आहे.
शिंदे गटातील तीन आमदारांची नुकतीच महामंडळाच्या अध्यक्षपदी वर्णी लागली होती. त्यामध्ये आनंदराव अडसूळ, हेमंत पाटील आणि संजय शिरसाटांच्या नावाचा समावेश आहे. टप्प्याटप्प्याने एकनाथ शिंदेकडून करण्यात येत असलेल्या महामंडळांच्या नियुक्त्यांवरून अजित पवार गटात त्यामुळे नाराजी निर्माण झाली आहे. सध्या सत्तेत केवळ एकाच पक्षाच्या पदाधिकार्‍यांना महामंडळ तसेच मंत्रिपदाचे वाटप होत असल्यामुळे राष्ट्रवादी काँग्रेस पक्षाच्या आमदारांमध्ये आणि पदाधिकार्‍यांमध्ये नाराजीचा सूर आहे. मात्र, विधानसभा निवडणुकाची घोषणा कुठल्याही क्षणी होऊ शकते. ऐन निवडणुकीच्या तोंडावर पद मिळत असल्याने गोगावले हे पद स्विकारणार का ? याकडे सर्वांच्या नजरा लागल्या आहेत. एसटी महामंडळाचे पदही कॅबिनेट दर्जाचे आहे. गोगावले यांनी यापूर्वीच सत्तांतरानंतर अनेकदा मंत्री मिळण्याबाबत आपली इच्छा बोलून दाखवली होती. मात्र, आता त्यांची बोळवण एसटी महामंडळावर केली जात असल्याचे दिसून येते. भरत गोगावले यांचे मंत्रीपद विरोधकांच्या टिंगलटवाळीचा विषय झाला होता. भरत गोगावले यांना मंत्रीपद मिळण्याची खात्री असल्याने त्यांनी शपथविधीसाठी खास कोट शिवून घेतला होता. मात्र, त्यांना मंत्रीपद न मिळाल्याने तो कोट तसाच पडून आहे, अशा शब्दांत विरोधकांनी गोगावले यांना अनेकदा खिजवले होते. मात्र, आता मंत्रीपद नाही पण किमान एसटी महामंडळाचे अध्यक्षपद मिळाल्याने भरत गोगावले यांच्या कोटाची घडी मोडणार, अशी चर्चा रंगली आहे.
एकनाथ शिंदे यांनी उद्धव ठाकरेंची साथ सोडून भाजपसोबत राजकीय संसार थाटल्यानंतर त्यांच्या पाठीशी ठामपणे उभे राहणार्‍या नेत्यांमध्ये भरत गोगावले आणि संजय शिरसाट यांचा समावेश आहे. भरत गोगावले यांनी अनेकदा आक्रमकपणे पक्षाची बाजू मांडली होती. ठाकरे गटाच्या नेत्यांनाही प्रत्युत्तर देण्याचे कामही ते सातत्याने करत असतात. त्यामुळे भरत गोगावले हे मंत्रिपदाचे प्रबळ दावेदार मानले जात होते. पहिल्या कॅबिनेट विस्तारातच त्यांना मंत्रिमंडळात घेतले जाईल, अशी चर्चा होती. मात्र, ऐनवेळी त्यांची मंत्रिपदाची संधी हुकली होती. त्यानंतर मंत्रिपदाची शपथ घेण्याचा योग भरत गोगावले यांच्याबाबत अद्यापही जुळून आलेला नाही. त्यामुळे भरत गोगावले नाराज असल्याचे सांगितले जाते.