…..तर भरत गोगावले मंत्रीपदापासून दूर?

भाजपकडे जाणार रायगडचे पालकत्व?
। अलिबाग । भारत रांजणकर ।
राज्यातील सत्तांतरामध्ये बंडखोरीची पहिली ठिणगी टाकणार्‍या रायगड जिल्ह्यातील बंडखोर आमदार भरत गोगावले हे मंत्रीपदाचे दावेदार आणि रायगडचे पालकमंत्री होतील, ही आशा लावून बसलेल्या खुद्द भरत गोगावले आणि त्यांच्या समर्थकांचे हिरमोड होण्याची शक्यता वर्तविण्यात येत आहे. गोगावले यांच्याकडे शिंदे गटाचे पक्ष प्रतोदपद हे महत्त्वाचे पद असल्याने त्यामुळे ‘एक व्यक्ती, एक पद’ या समीकरणाच्या अनुषंगाने त्यांना मंत्रिमंडळात समावेश होण्याची शक्यता धुसर वाटत आहे. त्याअनुषंगाने जिल्ह्याचे पालकमंत्रीपद देखील गोगावले यांच्याऐवजी भाजपकडे जाईल, असा अंदाज व्यक्त करण्यात येत आहे. त्यामुळे ज्यासाठी केला होता अट्टाहास त्यापासूनच पुन्हा एकदा वंचित राहावे लागण्याचे शल्य टोचून घ्यावे लागणार आहे.

महाविकास आघाडीमध्ये राष्ट्रवादी काँग्रेसला विरोध करण्याची सर्वात पहिली ठिणगी पडली ती रायगड जिल्ह्यात. शिवसेनेचे आमदार भरत गोगावले, महेंद्र थोरवे आणि महेंद्र दळवी या तीन आमदारांनी राष्ट्रवादीच्या अदिती तटकरे यांना सुरुवातीपासून विरोध केला. पालकमंत्री म्हणून अदिती तटकरे यांनी शिवसेनेवर अन्याय केला असल्याचा आरोप करीत बंडाचे हत्यार उगारले होते. याच बंडाच्या ठिणगीचा वणवा होऊन गेल्या महिन्यात राज्यात सत्तांतरनाट्य सुरु झाले. शिंदे गटाचे आमदार हे सत्तेत सहभागी होणार असल्याचे लक्षात येताच रायगड जिल्ह्यात भरत गोगावले यांना लाल दिव्याची गाडी मिळणार अशी चर्चा त्यांच्या समर्थकांच्या जोरदारपणे होऊ लागली. आणि, ज्या पालकमंत्रीपदासाठी सर्वकाही केले, त्या पालकमंत्रीपदाची माळदेखील गोगावले यांच्याच गळ्यात पडणार असल्याची अटकळ मांडली जाऊ लागली. मात्र, गुवाहाटी येथे असतानाच एकनाथ शिंदे यांनी आपल्या गटाचे पक्षप्रतोद म्हणून भरत गोगावले यांच्या नावाची घोषणा केली. त्यानंतर नाट्यमयरित्या एकनाथ शिंदे यांनी मुख्यमंत्रीपद स्वीकारले. तर, देवेंद्र फडणवीस हे उपमुख्यमंत्री झाले. उर्वरित मंत्रिमंडळ मात्र अजूनही करण्यात आलेली नाही.

रायगडात पुन्हा कलगीतुरा
येत्या काही दिवसांत मंत्रिमंडळाचा विस्तार होण्याची शक्यता आहे. यावेळी पहिल्या यादीत काही मोजक्या आमदारांना मंत्रीपद मिळणार असल्याचा अंदाज आहे. एकनाथ शिंदे यांच्या जवळचे मानले जाणारे गोगावले यांच्याकडे पक्षप्रतोदसारख्या महत्त्वाच्या पदाची जबाबदारी सोपविण्यात आली आहे. गुवाहाटीत एवढे आमदार असताना, या महत्त्वपूर्ण जबाबदारीसाठी त्यांनी गोगावले यांची निवड करुन या सर्व आमदारांमध्ये गोगावले हेच आपले सर्वाधिक निकटवर्तीय असल्याचे दाखवून दिले होते. मात्र, आता शिंदे यांचे निकटवर्तीय असणेच भोवणार की काय, अशी भीती त्यांच्या समर्थकांना वाटू लागली आहे. त्यामुळे साहजिकच त्यांना रायगडच्या पालकमंत्रीपदापासूनदेखील दूरच राहावे लागणार आहे. त्याचवेळी रायगडचे पालकमंत्रीपद भाजप आपल्या ताब्यात ठेवण्याची शक्यता जास्त आहे. भाजपकडून रवींद्र चव्हाण किंवा प्रवीण दरेकर तसेच प्रशांत ठाकूर यांचे नाव आघाडीवर आहे. असे झाले तर मात्र पुन्हा एकदा जिल्ह्यात भाजप आणि शिंदे गटात कलगीतुरा रंगण्याची शक्यता नाकारता येत नाही.