मातृत्वाच्या नात्याला काळिमा! पैशासाठी पोटच्या मुलांची विक्री

प्रियकराकडून अल्पवयीन मुलीवर अत्याचार

। चंद्रपूर । प्रतिनिधी ।

चंद्रपूर शहरातून मातृत्वाच्या नात्याला काळिमा फासणारा एक धक्कादायक प्रकार समोर आला आहे. एका महिलेने पैशासाठी स्वतःच्या पोटच्या दोन मुलांची विक्री केल्याचे उघडकीस आले आहे. संतापजनक बाब म्हणजे दोन मुलांची विक्री केल्यानंतर या महिलेने आपल्याच 15 वर्षांच्या अल्पवयीन मुलीच्या नवजात बाळाचीही विक्री करण्याचा कट रचला होता, मात्र या प्रकरणाची माहिती पोलिसांना मिळताच रामनगर पोलिसांनी तो कट उधळून लावला.

याप्रकरणी रामनगर पोलिसांनी नराधम आईसह, नवजात बाळाची खरेदी करणाऱ्या दोन महिलांना बेड्या ठोकल्या आहेत. या प्रकरणातील मुख्य सूत्रधार आणि मुलीवर अत्याचार करणारा महिलेचा प्रियकर अजय फुलझेले हा सध्या फरार असून पोलीस त्याचा कसून शोध घेत आहेत. या चौघांवरही मानवी तस्करी आणि ‘पॉक्सो’ अंतर्गत गंभीर गुन्हे दाखल करण्यात आले आहेत.

मिळालेल्या माहितीनुसार, मुख्य आरोपी असलेल्या 40 वर्षीय महिलेच्या पतीचे काही वर्षांपूर्वी निधन झाले होते. पतीच्या मृत्यूनंतर या महिलेची 26 वर्षीय अजय फुलझेले याच्याशी ओळख झाली. हे दोघेही त्या 15 वर्षांच्या अल्पवयीन मुलीसह लिव्ह-इन रिलेशनशिपमध्ये राहत होते. दरम्यान, अजय फुलझेलेपासून झालेल्या दोन बाळांची या महिलेने जून 2024 आणि ऑक्टोबर 2025 मध्ये तेलंगानाच्या कागजनगर आणि चंद्रपूर शहरातील एका महिलेला अंदाजे चार ते पाच लाख रुपयांमध्ये विक्री केली होती. याच दरम्यान आरोपी प्रियकर अजय फुलझेले याने मुख्य आरोपी असलेल्या महिलेच्या 15 वर्षीय मुलीवर लैंगिक अत्याचार केला. या अत्याचारातून गर्भवती झालेल्या अल्पवयीन मुलीची नागपूर मेडिकल कॉलेजमध्ये प्रसूती करण्यात आली. मात्र या सर्व प्रकरणाचा रामनगर पोलिसांना सुगावा लागल्याने त्यांनी पीडित अल्पवयीन मुलीचा जबाब नोंदवला असता सत्य समोर आले.

पीडितेच्या जबाबावरून रामनगर पोलिसांनी मुख्य आरोपी असलेली महिला आणि बाळ विकत घेणाऱ्या कागजनगर आणि चंद्रपूर शहरातील दोन महिलांना अटक केली आहे. तर या प्रकरणातील आरोपी प्रियकर अजय फुलझेले सध्या फरार असून पोलीस त्याचा त्याचा शोध घेत आहे.

या प्रकरणामागे नवजात बाळांची विक्री करणारं रॅकेट सक्रिय आहे का? याचा देखील पोलीस शोध घेत आहेत. या घटनेने शहरात एकच खळबळ उडाली असून सर्वत्र संताप व्यक्त केला जात आहे.