कोट्यवधींचा मलनिःसारण प्रकल्प वादात!

काम अवघे 30 टक्के; बिलांचा सपाटा; माथेरानकरांच्या आरोग्याशी खेळ?

| नेरळ | प्रतिनिधी |

माथेरान शहरासाठी महाराष्ट्र जीवन प्राधिकरणामार्फत राबविण्यात येत असलेल्या 47 कोटी रुपयांच्या मलनिःसारण प्रकल्पावर गंभीर प्रश्नचिन्ह निर्माण झाले आहे. मानवी हक्क आयोगाच्या शिफारशीनुसार सुरू करण्यात आलेला हा प्रकल्प अद्याप पूर्णत्वापासून दूर असतानाच मोठ्या प्रमाणावर ठेकेदाराला देयके अदा करण्यात आल्याची चर्चा रंगली आहे. त्यामुळे हा विकास प्रकल्प की माथेरानकरांची फसवणूक, असा सवाल उपस्थित होत आहे.

यापूर्वी या प्रकल्पातील निकृष्ट कामांची पोलखोल झाल्यानंतर प्रशासनाने नागरिकांच्या शंकांचे निरसन करण्यासाठी एका महिन्याच्या आत ठेकेदारासोबत बैठक घेण्याचे आश्वासन दिले होते. मात्र, एक महिना उलटूनही बैठक न झाल्याने नागरिकांमध्ये संताप व्यक्त होत आहे.

धक्कादायक बाब म्हणजे, प्रकल्पाचे काम अद्याप 30 टक्केही पूर्ण झाले नसल्याचा आरोप होत असताना मोठ्या प्रमाणावर बिलांचे भुगतान करण्यात आल्याची चर्चा आहे. अनेक ठिकाणी मलनिःसारण वाहिन्यांची कामे अर्धवट असून, कामाच्या गुणवत्तेबाबतही प्रश्न उपस्थित केले जात आहेत. काही दिवसांपूर्वी ठेकेदाराच्या निष्काळजीपणामुळे एका घोड्याचा अपघात झाल्याची घटना घडली होती. मात्र, त्यानंतरही प्रशासनाकडून ठोस कारवाई झाल्याचे दिसून आले नाही.

या पार्श्वभूमीवर विरोधी पक्षनेते सीताराम कुंभार आणि नगरसेवक सचिन दाभेकर यांनी थेट माथेरान नगरपरिषद गाठून मुख्याधिकारी राहुल इंगळे यांना जाब विचारला. नागरिकांच्या आरोग्याशी संबंधित प्रकल्पात हलगर्जीपणा खपवून घेतला जाणार नसल्याचा इशाराही त्यांनी दिला. विकासाच्या नावाखाली कोट्यवधी रुपयांचा निधी खर्च करूनही कामे अर्धवट राहणार आणि देयके मात्र वेळेवर दिली जाणार असतील, तर हा जनतेच्या पैशांचा अपव्यय असल्याची टीका होत आहे. या प्रकरणाची स्वतंत्र चौकशी करून जबाबदारांवर कारवाई करावी, तसेच मानवी हक्क आयोगानेही या संपूर्ण प्रकरणात लक्ष घालावे, अशी मागणी नागरिकांतून होत आहे.