अंधेरीत बॉम्ब ठेवल्याची धमकी; मुंबई पोलीस सतर्क

। मुंबई । प्रतिनिधी ।

अंधेरीत बॉम्ब ठेवल्याची धमकी मुंबई पोलिसांच्या नियंत्रण कक्षाला शुक्रवारी (दि. 02) पहाटे प्राप्त झाली. या घटनेनंतर सर्व यंत्रणा सतर्क झाल्या असून तात्काळ शोध मोहीम हाती घेण्यात आली. मात्र, शोध मोहिमेत काहीच संशयास्पद सापडले नाही. याप्रकरणी एका 19 वर्षीय तरूणाला ताब्यात घेण्यात आले.

मुंबई पोलिसांच्या मुख्य नियंत्रण कक्षाला शुक्रवारी पहाटे धमकीचा दूरध्वनी आला. मुंबई पोलिसांच्या मुख्य नियंत्रण कक्षातील महिला पोलीस शिपायाने दूरध्वनी उचलला. अंधेरीतील मुकुंद नगर येथील मरोळ पाईप लाईन जवळील अनमोल अपार्टमेंटमध्ये बॅग आहे. त्या बॅगमध्ये बॉम्ब अथवा शस्त्र ठेवले आहे. ते तेथून लवकर येथून हटवा, असे दूरध्वनी करणार्‍या व्यक्तीने सांगितले. त्यामुळे महिला पोलिसाने तात्काळ याबाबतीच माहिती वरिष्ठ अधिकार्‍यांना दिली. त्यानंतर सर्व यंत्रणांना सतर्क करण्यात आले.

दूरध्वनी करणार्‍या व्यक्तीने सांगितलेल्या पत्त्यावर पोलिसांनी तात्काळ धाव घेतली. पोलिसांनी घटनास्थळी तपासणी केली असता बॉम्ब अथवा शस्त्र सापडले नाही. याप्रकरणी पोलिसांनी एका 19 वर्षीय तरूणाला संशयावरून ताब्यात घेतले. कुटुंबियांची चौकशी केली असता त्या तरूणाला ऑटीझम आजार असून तो काहीही बडबडतो, असे त्यांनी सांगितले. त्याच्यावर रुग्णालयात उपचार सुरू आहेत.