। माणगाव । विशेष प्रतिनिधी ।
अपहरण केलेल्या गोंडस लहानग्याची अखेर हत्या केल्याची खळबळजनक घटना शुक्रवारी (दि.29)समोर आली. रुद्र अरुण यादव (वय 3) याची हत्या करून रोहा तालुक्यातील चणेरा रस्त्यालगत आरे गावच्या हद्दीत टाकण्याचा घृणास्पद व माणुसकीला काळीमा फासणारा प्रकार नराधम आरोपी संतोष अशोक यादव याने केला. चिमुकल्याची हत्या केल्यानंतर आरोपी संतोष यादव याने पलायन केले होते. मात्र आरोपीला काही तासानंतर शोधण्यात रायगड विशेष पोलीस पथकाला यश आले.
लाल काळ्या रंगाच्या होंडा शाईन गाडी क्र. एमएच 06 बीएक्स 8824 असलेल्या याच आरोपीला रोहा शहरात पाहिले होते. त्याच अंदाजावरून आरोपीचा शोध सुरू झाला होता. अखेर आरोपी संतोष यादव याला पोलिसांनी गुजरात महाराष्ट्र सिमारेषेवरील वापी येथून ताब्यात घेतले आणि हत्या करून टाकून दिलेल्या गोंडस मुलाचा शोध लागला. लहान मुलाच्या हत्येच्या घटनेने अख्खा रायगड अक्षरशः सुन्न झाला. ही बाब समजताच लहानग्याच्या आई-वडिलांनी अक्षरशः टाहो फोडला.माणगांव तालुक्यातील बोर्ले येथील रुद्र यादव या लहानग्याला घरासमोरील अंगणातून आरोपी संतोष अशोक यादव (वय 30) याने गाडीवर फेरफटका मारण्याच्या कारणाने मंगळवारी सायंकाळी अपहरण केले. या गुन्ह्याची नोंद माणगांव पोलीस ठाण्यात करण्यात आली होती. त्यानुसार मुलाचा शोध सुरू झाला. मुलगा आढळल्यास तातडीने संपर्क साधण्याचे आवाहन माणगाव पोलीस ठाण्याचे पोलीस निरीक्षक अश्‍वनाथ खेडकर यांनी केले होते.
शोधकार्यात मुलाचा तब्बल दोन दिवस तपास लागला नाही. याच चर्चेत आरोपी संतोष यादव याला गाडीसह रोहा शहरात पाहिल्याचे अनेकांनी सांगितले आणि रोहा पोलिसांनीही शोध सुरू केला. आरोपीने आरे बुद्रुक गावच्या हद्दीत लहानग्याला मारून टाकले, असेही एका व्यक्तीने पाहिल्याची चर्चा सुरू झाली. दुसरीकडे आरोपी संतोष यादव याला रायगड पोलिसांनी महाराष्ट्र सीमेवर पकडले आणि आरोपीला बोलते केले. लहानग्याला कुठे मारून टाकले, हे त्याने सांगितले. त्यानुसार आरोपीला घटनास्थळी नेले. घटनास्थळीही आरोपीने वारंवार गुमरान केले. त्यानंतर मुलाला जिथे फेकून टाकले, त्या ठिकाणचा शोध घेताच मुलाचे प्रेत सापडले.
मुलाला पाहताच नातेवाईक, सर्वांच्याच काळजाचा ठोका चुकला. नराधम आरोपी संतोष यादव याने क्रुर कृत्य केले. माणूसकीला अक्षरशः काळीमा फासले. यादव याने क्रुर कृत्य का केले ? याची चर्चा सुरू झाली. हा प्रकार कौटुंबिक वादातून झाल्याचेही बोलले जाते. यावर शेजारी व ग्रामस्थही फारसे बोलायला उत्साही दिसत नसल्याचे समोर आले. अधिक माहीती घेतली असता हा प्रकार भलत्याच वळणावर जाणार असल्याचे संकेत मिळाले आहेत.लहानगा रुद्र अरूण यादव याची हत्या केल्याच्या घटनेने संबंध रायगड हादरून गेला. रूद्र यादव या चिमुकल्याचे प्रेत शुक्रवारी सकाळी सापडले. त्याचा मृतदेह शवविच्छेदसाठी जेजे हॉस्पिटल येथे पाठविण्यात आला आहे.
रायगड विशेष पोलीस पथकानी आरोपीला शोधून काढले. नंतर माणगांव पोलिसांनी आरोपी संतोष यादव याला ताब्यात घेतले. याबाबतचा नेमका घटनाक्रम काय, कौटुंबिक वादातून की अन्य कारणातून हत्या केली का? याचा अधिक तपास पोलीस अधीक्षक डॉ.अशोक दुधे यांच्या मार्गदर्शनाखाली माणगांव पोलीस करीत आहेत. दरम्यान, रुद्र यादव या लहानग्याच्या हत्येने एकच खळबळ उडाली आहे. माणुसकीला काळीमा फासणार्‍या घटनेने सृजन समाज स्तब्ध झाला आहे.