मुरुड समुद्रकिनारी पर्यटकांची रेलचेल

व्यवसायिकांच्या चेहरावर आनंद

| आगरदांडा-मुरूड जंजिरा | प्रतिनिधी |

मुरूड समुद्रकिनारी पर्यटकांची रेलचेल सुरू झाली असून, दोन महिन्यांपासून पर्यटकांच्या प्रतिक्षेत असणाऱ्या मुरूडकरांची चिंता आता मिटली आहे. सध्या मुरुड शहरात सकाळी थंडी तर दुपारी गरम असे वातावरण असल्याने रविवारी (दि.22) दुपारी पर्यटकांनी मुरुडच्या किनाऱ्यावर येणे पसंत केले. त्याचबरोबर पर्यटकांनी ताज्या मासळीवर ताव मारला असून, सुकी मासळी खरेदी करण्यावर पसंती दर्शवली. त्यामुळे पर्यटनावर अवलंबुन असणारे व्यावसायिक व मासळी विक्रेत्यांच्या चेहऱ्यावर आनंद दिसत आहे.

गेल्या दोन महिन्यांपासुन दहावी व बारावी बोर्डाच्या तसेच इतर वर्गातील मुलांच्या परिक्षा सुरू होत्या. त्यामुळे बहुतांश पर्यटकांनी रायगड जिल्ह्यासह मुरूड तालुक्याकडे पाठ फिरवली होती. मात्र, आता परिक्षा संपल्याने पर्यटकांची रेलचले जिल्ह्यात सर्वत्र दिसून येत आहे. मुरूड तालुक्यातील जंजिरा किल्ल्यासह मुरुड पासून जवळच असणारे गारंबी धारण, कुडे मांदाड लेणी, खोकरी व दत्तमंदिर पाहण्यासाठी पर्यटक दरवर्षी मोठ्या संख्येने मुरूडमध्ये हजेरी लावत असतात. या पर्यटन स्थळावर स्वछता करून खाण्यापिण्याचे स्टॉल लावण्यात आले आहेत. नुकत्याच विद्यार्थ्यांच्या परिक्षा संपल्याने संपुर्ण राज्यभरातील शेकडो पर्यटकांनी आपला मोर्चा मुरूडकडे वळवला आहे. मुरूडमधील वातावरण काही प्रमाणात बिघडले असून, सकाळी थंडी तर दुपारी प्रचंड गर्मी असते. मात्र, असे असतानाही पर्यटकांनी दुपारच्या वेळी मुरूड व काशीद समुद्रकिनारी पाण्यात पोहत मज्जा मस्ती करण्याचा आनंद घेतला. तर, काही पर्यटकांनी घोडागाडी, घोडेस्वारी व जलक्रीडाचा आनंद घेतला. त्यानंतर पर्यटकांनी येथील समुद्रकिनारी असलेल्या हॉटेलमध्ये तसेच खाद्यपदार्थांच्या स्टॉलवर जाऊन मेजवानीचा आनंद घेतला. विशेष करून पर्यटकांनी मासळीवर ताव मारला. त्यामुळे येथील व्यावसायिकांचे चेहरे आनंदाने फुलले आहेत.

उन्हाळी सुट्टीसाठी मुरूडकर सज्ज
नुकत्याच विद्यार्थ्यांच्या परिक्षा संपल्याने आता उन्हाळी सुट्टी सुरू झाल्या आहेत. त्यामुळे पर्यटकांनी शनिवार-रविविरी आपला मोर्चा मुरूडकडे वळवला आहे. हा पर्यटनाचा हंगाम पुढील दोन महिने तरी असाच चालु राहणार आहे. त्यामुळे उन्हाळी सुट्टीसाठी मुरूडमधील हॉटेल, रिसॉर्ट, कॉटेजेस, स्टॉलधारक व पर्यटनावर अवलंबून असणारे इतर छोटे मोठे व्यावसायिक सज्ज झाले आहेत. त्याचबरोबर घोडेस्वारी, घोडागाडी, मोटार बाईक व जलक्रीडा यामुळे मुरूडमधील समुद्रकिनारे बहरले आहेत. तसेच, नगरपालिकेने समुद्रकिनारी असलेल्या विश्राम धाम बागेचे नूतनीकरण केल्याने त्याचा लाभ देखील पर्यटकांना होणार आहे. त्याचबरोबर मुरूड समुद्रकिनारी पालिकेचे स्वच्छता कर्मचारी दिवसातून 3 वेळा साफसफाई करत असतात.

ताज्या मासठीवर ताव
सध्या समुद्रातील वातावरण खराब असल्याने मासेमारी कमी प्रमाणात होत आहे. त्यामुळे मासळीचे भाव काही प्रमाणात वधारले आहेत. असे असतानाही पर्यटकांनी ताजी मासळी खाण्याला पसंती दर्शवली आहे. काही पर्यटकांनी स्वतः मासळी बाजारात जाऊन ताजी मासळी खरेदी केली. तसेच, पावसाळ्यासाठी मोठ्या प्रमाणात सुकी मच्छि खरेदी केली. त्यामुळे मासळी विकेत्यांचा चेहऱ्यावर देखील मोठ्या प्रमाणात आनंद दिसत आहे.