नागोठणे महिला पोलिसांची कौतुकास्पद कामगिरी

हरविलेल्या महिलेच्या कुटुंबियांचा लावला शोध; स्वखर्चातून केले वैद्यकीय उपचार

| नागोठणे | प्रतिनिधी |

आजच्या जगात माणुसकी दुर्मिळ झाली आहे असे बोलले जाते. मात्र आजही माणुसकीचा झरा जिवंत असल्याची कौतुकास्पद कामगिरी नागोठणे पोलीस ठाण्यातील दामिनी पथकातील तीन महिला पोलीस हवालदार व दोन पोलीस कर्मचाऱ्यांनी केली आहे. नागोठणे पोलीस ठाण्याचे प्रभारी अधिकारी सचिन कुलकर्णी यांच्या मार्गदर्शनाखाली नागोठणे पोलिसांनी केलेल्या या कौतुकास्पद कार्याचे सर्वत्र कौतुक होत आहे.

यासंदर्भात नागोठणे पोलीस ठाण्याचे प्रभारी पोलीस अधिकारी सचिन कुलकर्णी यांनी दिलेल्या माहितीनुसार, गुरुवार, दि. 9 ऑक्टोबर रोजी सायंकाळी सहा वाजण्याच्या सुमारास नागोठणे पोलीस ठाणे हद्दीत बाजारपेठ येथे एक महिला मानसिक संतुलन बिघडलेल्या अवस्थेत एकटीच फिरताना दिसून आली. बाजारपेठ येथील नागरिकांनी दिलेल्या माहितीच्या आधारे दामिनी पथकाच्या म.पो.हवा. सरोजिनी सावंत, म.पो. हवा. प्रीती ओमले, म.पो. हवा. मोनिका शेरामकर यांनी त्या महिलेला ताब्यात घेतले. नंतर तिला जेवण देऊन वैद्यकीय मदत करून तिला शांत करून नागोठणे पोलीस ठाण्यात आणले.

या महिलेकडे सखोल चौकशी केली असता तिची आई जयश्री बाळासाहेब थोबडे यांचा मोबाईल नंबर तिने पोलिसांना दिला. त्यानंतर त्यावर व्हिडिओ कॉल केला असता त्यांनी सदर महिलेला ओळखून ती महिला त्यांचीच मुलगी प्रियांका बाळासाहेब थोबडे, वय 40 वर्ष, रा. शाहीर वस्ती, तुळजापूर वेस, सोलापूर येथील असल्याचे तसेच तिचे मानसिक संतुलन बिघडले असल्याचे तिच्या आईने सांगितले.

पोलिसांनी महिलेच्या आईकडून त्यांचा राहता पत्ता घेऊन जिल्हा पोलीस अधीक्षक आचल दलाल, अपर पोलीस अधीक्षक अभिजीत शिवथरे, उपविभागीय पोलीस अधिकारी रोहा प्रसाद गोकुळे यांच्या मार्गदर्शनाखाली प्रभारी नागोठणे पोलीस ठाण्याचे प्रभारी अधिकारी सचिन कुलकर्णी, पो.ह. अथर्व पाटील, म.पो. हवा. सरोजिनी सावंत, म.पो. हवा. प्रीती ओमले, चालक पो.शि. मिलिंद महाडिक आदींचे पोलीस पथक तात्काळ सोलापूर येथील सांगितलेल्या ठिकाणी रवाना होऊन शुक्रवार, दि. 10 ऑक्टोबर रोजी सकाळी 8.30 वाजण्याच्या सुमारास नागोठण्यात सापडलेल्या महिलेला तिच्या आईच्या ताब्यात देण्यात आली. नागोठणे पोलिसांच्या या जलदगती कारवाईचे सर्व स्तरातून कौतुक होत आहे.