बॉक्सिंग स्पर्धेत निसर्गा गवळीचे सुवर्ण यश

। नेरळ । वार्ताहर ।

कर्जत तालुक्यातील वंजारपाडा येथे असलेल्या माथेरान व्हॅली स्कूलमधील विद्यार्थिनी निसर्गा गवळी हिने बॉक्सिंग स्पर्धेत मोठे यश संपादन केले आहे. तेथे झालेल्या एशियन स्पर्धेत निसर्गा हिने सुवर्ण पदकाला गवसणी घातली.

गोवा येथे झालेल्या एशियन बॉक्सिंग स्पर्धेत कर्जत तालुक्यातील माथेरान व्हॅली स्कूलमधील निसर्गा गवळी सहभागी झाली होती. या स्पर्धेत इंडियन बॉक्सिंग टीममधून सहभागी होताना आपल्या देशाचे प्रतिनिधित्व करताना 14 वर्षीय निसर्गा गवळी हिने 77 किलो वजनी गटात सहभाग घेतला. त्या ठिकाणी कंबोडिया देशाच्या खेळाडू सोबत दोन हात करताना अंतिम फेरीत चार विरुद्ध शून्य असे यश संपादन करीत पदकाला गवसणी घातली. भारत एज्युकेशन सोसायटीचे अध्यक्ष गोपा कुमार नाय्यर तसेच उपाध्यक्ष, मुख्य कार्यकारी अधिकारी अन्य पदाधिकारी आणि मुख्याध्यापिका मृदुला पटेल यांनी अभिनंदन केले आहे.

निसर्गा ही मानिवली गावातील रहिवाशी असून ती माथेरान व्हॅली स्कूल वंजार पाडा मध्ये शिकत आहे. तिला खेळासाठी आई-वडिलांचा कायम पाठिंबा असून क्रीडा प्रशिक्षक स्वप्निल अडुरकर आणि करण बाबरे यांचे मोलाचे प्रशिक्षण लाभले आहे.