दोन अल्पवयीन मुलींसोबत अश्‍लील चाळे

आरोपीवर पोस्को अंतर्गत गुन्हा दाखल

| महाड | प्रतिनिधी |

नुकतीच काही महिन्यांपूर्वी विनयभंगप्रकरणी तुरुंगाची हवा खाऊन आलेल्या एका विकृत मानसिकतेच्या तरुणाने पुन्हा एकदा दोन शाळकरी अल्पवयीन मुलींसोबत अश्‍लील चाळे केल्याची धक्कादायक घटना सोमवारी महाड शहरामध्ये घडली आहे.

याबाबत पोलीस सूत्रांकडून मिळालेल्या सविस्तर माहितीनुसार, दि. 14 एप्रिल रोजी दुपारी 12.15 च्या सुमारास महाड शहरातील एका सोसायटीच्या पार्किंगमधील कार्यालयात या दोन अल्पवयीन मुली आपली शिकवणी संपवून काही कामानिमित्त गेल्या होत्या. दरम्यान, आरोपीने कार्यालयात घुसून त्यांच्यासोबत अश्‍लील चाळे करून त्यांच्या मनात लज्जा उत्पन्न होईल असे वर्तन केले. या घटनेबाबत मुलींच्या नातेवाईकांनी दिलेल्या तक्रारीनुसार, पोलिसांनी ओंकार रजनीकांत रणदिवे, (27), रा. महाड शहर याच्याविरोधात पोक्सो अंतर्गत गुन्हा दाखल केला आहे. घटनेचा अधिक तपास महाड शहर पोलीस ठाण्याचे पोलीस निरीक्षक संतोष जाधव यांच्या मार्गदर्शनाखाली सुरू आहे. या घटनेने महाड शहरात एकच खळबळ उडाली असून, या विकृत मनोवृत्तीच्या आरोपीस कठोरात कठोर शासन करण्यात यावे, अशी मागणी नागरिकांकडून करण्यात येत आहे.