‘या’ कालावधीत कसारा घाट राहणार बंद

रस्ता दुरुस्ती कामामुळे वाहतूक निर्बंध; अवजड वाहनांना पूर्णपणे बंदी

। नाशिक । प्रतिनिधी ।

मुंबई-आग्रा महामार्गावरील इगतपुरीजवळील जुना कसारा घाट दुरुस्ती कामामुळे साेमवार दि. 24 फेब्रुवारी 2025 ते गुरुवार दि. 27 फेब्रुवारी 2025 या कालावधीत तसेच, 3 मार्च ते 6 मार्च या कालावधीत सकाळी आठ ते सायंकाळी सहा या वेळेत वाहतुकीसाठी बंद ठेवण्यात येणार आहे. या कालावधीत मुंबईकडून नाशिककडे जाणारी वाहने नवीन कसारा घाटमार्गे जातील. सायंकाळनंतर सकाळी आठपर्यंत ही वाहतूक जुन्या कसारा घाटातील नेहमीच्या मार्गाने होईल. तसेच, या कालावधीत घाटातील अवजड वाहनांची वाहतूक पूर्णत: बंद राहणार आहे. त्यामुळे प्रवाशांना काही दिवस त्रासाला समोरे जावे लागणार आहे.

नाशिक-मुंबई महामार्गावरील वाहतूक निर्बंधांची अधिसूचना अपर पोलीस महासंचालक (वाहतूक) कार्यालयाने काढली आहे. राष्ट्रीय महामार्ग प्राधिकरणच्यावतीने जुन्या कसारा घाटात दुरुस्तीचे काम करण्यात येणार आहे. वाहतूक कोंडी टाळण्यासाठी नाशिक-मुंबई दरम्यानच्या वाहतुकीत बदल करून काही निर्बंध घालण्यात आले. त्यानुसार या काळात मुंबई-नाशिक आणि नाशिक-मुंबई या घाटातील दोन्ही मार्गावर मध्यरात्रीपासून ते दुसऱ्या दिवशी रात्रीपर्यंत अवजड वाहनांची वाहतूक पूर्णत: बंद राहील.

अवजड वाहनधारकांना या काळात नाशिक-पुणे राष्ट्रीय महामार्ग क्रमांक 60 वरून यशवंतराव चव्हाण मुंबई-पुणे द्रुतगती मार्गावरून इच्छितस्थळी जाता येईल. वाहतुकीचे हे निर्बंध राष्ट्रीय महामार्ग प्राधिकरणाकडून दुरुस्तीचे काम पूर्ण होईपर्यंत अंमलात राहणार असल्याचे अपर पोलीस महासंचालक (वाहतूक) डॉ. सुरेश मेकला यांनी नमूद केले आहे.

दरम्यान, कसारा घाटातील रस्ते दुरुस्ती व त्यामुळे वळविण्यात येणारी मार्ग लक्षात घेता मुंबई-नाशिक-शिर्डी प्रवास करणाऱ्या प्रवाशांनी या कालावधीदरम्यान वाहनचालकांना काही अडचण असल्यास मदतीसाठी कसारा पोलीस, महामार्ग पोलीस घोटी केंद्र, महामार्ग पोलीस शहापूर केंद्र, आपत्ती व्यवस्थापन टीम नवीन कसारा घाटात कार्यरत राहणार असून नवीन कसारा घाटात ठीकठिकाणी पोलीस कर्मचारी व मदत केंद्र उभारली जाणार आहेत.