ओम मुंडे ओडिशाच्या रणजी संघात

| परभणी | प्रतिनिधी |

परभणीच्या मातीतून क्रिकेटविश्वात उल्लेखनीय वाटचाल करणाऱ्या मानवत येथील युवा क्रिकेटपटू ओम तुकाराम मुंडे याने आपल्या कामगिरीच्या जोरावर नवा इतिहास रचला आहे. ओमची 2026-27च्या रणजी ट्रॉफी हंगामासाठी ओडिशाच्या 17 सदस्यीय वरिष्ठ संघात निवड झाली आहे. ग्रामीण भागातून आलेल्या या युवा खेळाडूची देशातील सर्वोच्च देशांतर्गत क्रिकेट स्पर्धेसाठी निवड होणे ही परभणीसह संपूर्ण मराठवाड्यासाठी अभिमानाची बाब ठरली आहे. ओम हा 23 वर्षीय उजव्या हाताचा फलंदाज असून लेग-ब्रेक गोलंदाजीही करतो. त्याने यापूर्वी ओडिशाकडून देशांतर्गत क्रिकेटमध्ये आपली क्षमता सिद्ध केली आहे. 2025-26च्या विजय हजारे ट्रॉफीमध्ये त्याने लिस्ट-ए क्रिकेटमध्ये पदार्पण केले. रेल्वेविरुद्धच्या सामन्यात त्याने शानदार 91 धावांची खेळी करत आपली गुणवत्ता दाखवून दिली. ओडिशाच्या वरिष्ठ पुरुष निवड समितीचे अध्यक्ष कुलामणी परिदा आणि मुख्य प्रशिक्षक प्ररंजन मल्लिक यांनी रणजी ट्रॉफीसाठी 17 सदस्यीय संघाची घोषणा केली. या संघात ओम मुंडेला प्रथमच स्थान मिळाले असून त्याच्यासाठी ही रणजी क्रिकेटमधील पदार्पणाची संधी आहे. संघाचे नेतृत्व शुभ्रांशू सेनापती करणार आहेत. यंदाच्या रणजी ट्रॉफीमध्ये ओडिशाचा संघ एलिट-सी गटात खेळणार आहे. ओमच्या निवडीमुळे परभणीतील क्रिकेटप्रेमी, प्रशिक्षक, क्रीडा संस्था आणि त्याच्या मार्गदर्शकांमध्ये उत्साहाचे वातावरण आहे. ग्रामीण भागातून सुरुवात करून मेहनत, सातत्य आणि गुणवत्तेच्या जोरावर रणजी संघापर्यंत मजल मारणाऱ्या ओमची ही निवड परभणीतील युवा क्रिकेटपटूंसाठी प्रेरणादायी ठरणार आहे.