कार अपघातात एकाचा मृत्यू; चार जखमी

। पनवेल । वार्ताहर ।

खारघर येथे रस्त्यावरील खड्डा चुकविण्याच्या नादात गाडीचा ब्रेक दाबण्याऐवजी एक्सलेटर दाबल्यामुळे गाडी रस्त्याच्या दुभाजकाला धडकून पलटी झाली. या अपघातात गाडीतील एकाचा मृत्यू झाला असून अन्य चार जण जखमी झाले आहेत.

कारचालक अर्णव बिरारी (18), पक्ष सावरिया (18), यश मोर्या (18), अग्रीम पराशर व दर्श जैन (18) हे पाच जण खारघर पेठ पाडा येथील एन.एन.आय.एम. कॉलेजमध्ये कॉम्प्युटर इंजिनिअरिंगच्या पहिल्या वर्षाचे शिक्षण घेत आहेत. यातील अर्णव बिरारी या विद्यार्थ्याने त्याच्या वडिलांची गाडी कॉलेजमध्ये आणली होती. त्यानंतर हे पाचही जण गाडीतून खारघरमधून फेरफटका मारण्यासाठी गेले. यावेळी अर्णव गुरुद्वारासमोरील रोडवरुन जात असताना त्याने रस्त्यावरील खड्डा चुकविण्याचा प्रयत्न केला. यासाठी त्याने कारचे स्टेअरिंग उजव्या बाजूस वळविले असता ही गाडी रस्ता दुभाजकाला घासली त्यामुळे गोंधळलेल्या अर्णवने ब्रेक दाबण्याऐवजी कारचे एक्सलेटर दाबले. त्यामुळे कार भरधाव वेगाने पुढे जावून ती रस्त्याच्या दुभाजकाला जाऊन जोरदार आदळून पलटी झाली. या अपघातात दर्श जैन हा गंभीर जखमी झाल्याने त्याचा मृत्यू झाला, तर त्याचे इतर 4 मित्र जखमी झाले आहेत. या अपघाताची नोंद खारघर पोलीस ठाण्यात करण्यात आली आहे.