। महाड । प्रतिनिधी ।
महाड तालुक्यातील दासगाव हद्दीत ट्रक आणि कंटनेरमध्ये समोरासमोर धडक झाली. यामध्ये एकाचा जागीच मृत्यू झाला तर दोघेजण गंभीर जखमी झाले. हा अपघात गुरुवारी (दि.1) पहाटे चार वाजण्याच्या सुमारास झाला.
मुंबईहुन गोव्याकडे जाणार्या कंटेनरने मुंबईकडे जाणार्या आयशर टेम्पोला जोराने धडक दिली. अपघात एवढा भीषण होता की, दोन्ही गाड्यांचे प्रचंड नुकसान झाले. या धडकेत आयशर टेम्पोचालक अशोक गोविंद बारगीर (रा. दासगाव) जागीच ठार झाला तर टेम्पोमधील प्रवासी महफुज मजिदुल्ला खान (रा.नागलवाडी महाड) तसेच कंटेनरचालक दिनेश कुमार बीजनाथ यादव (रा.बिहार) हे दोघेजण गंभीर जखमी झाले. अपघातानंतर सुमारे दीड तास कंटेनरचालक हा गाडीत अडकला होता.
अपघाताची माहिती मिळताच महाड शहर पोलीस ठाण्याचे पोलीस निरीक्षक एम.पी. खोपडे सहकार्यांसह घटनास्थळी पोहचले. त्याचबरोबर महामार्ग वाहतूक पोलीस शाखा महाडचे पोलीस हवालदार मंदार लहाने सहकार्यांसोबत घटनास्थळी पोहोचून त्यांनी जखमींना महाड ग्रामीण रुग्णालयात दाखल केले. तसेच महामार्गावरील वाहतूक सुरळीत केली. त्यानंतर अडकलेल्या कंटेनर चालकाला अथक प्रयत्न करून बाहेर काढून त्याचे प्राण वाचवले.