पालकमंत्री आदिती तटकरे यांनी व्यक्त केला विश्वास
पालीत शेकाप-राष्ट्रवादी आघाडीच्या उमेदवारांचा होम टू होम प्रचार
। पाली/बेणसे । वार्ताहर ।
पाली नगरपंचायतीच्या माध्यमातून पाली शहर व परिसराच्या सर्वांगीण व शाश्वत विकास करण्याचे आमचे ध्येय आहे. खासदार सुनील तटकरे, शेकाप नेते आमदार जयंत पाटील यांच्या मार्गदर्शनाखाली नागरिकांना मूलभूत, पायाभूत नागरी सेवा सुविधा पुरविण्यासाठी आम्ही कटिबद्ध राहणार आहोत. चारही प्रभागांत जनतेतून उत्स्फूर्त व सकारात्मक प्रतिसाद लाभत आहे. पालीतील सुज्ञ जनता शहराच्या सर्वांगीण विकासासाठी शेकाप-राष्ट्रवादी आघाडीला बहुमत देईल, असा विश्वास पालकमंत्री आदिती तटकरे यांनी व्यक्त केला.
शेकाप-राष्ट्रवादी आघाडीचे उमेदवार तरुण, उच्चशिक्षित, अनुभवी, सेवाभावी उमेदवार निवडणूक रिंगणात उतरले आहेत. लोकाभिमुख चेहरे असलेल्या उमेदवारांना जनता भरघोस मतांनी विजयी करेल, असा विश्वास तटकरे यांनी व्यक्त केला. अष्टविनायकाचे धार्मिक तीर्थक्षेत्र असलेल्या बल्लाळेश्वर देवस्थान व सुधागड तालुक्याचे मुख्यालय असलेल्या पाली नगरपंचायत सार्वत्रिक निवडणूक 2021 ची रणधुमाळी जोरात सुरू आहे. शेकाप व राष्ट्रवादी आघाडी या निवडणुकीत एकत्रितपणे सामोरे जात आहेत. प्रचार व प्रसार शिगेला पोहचला आहे.
पालकमंत्री आदिती तटकरे, शेकाप नेते जि.प. सदस्य सुरेश खैरे, राष्ट्रवादी काँग्रेसच्या जिल्हाध्यक्ष गीता पालरेचा यांच्या प्रमुख उपस्थितीत आघाडीचे उमेदवार करुणा ललित ठोंबरे, आर्किटेक्ट प्रभाग क्र. 2, अशिक गफूर मणियार, प्रभाग क्र 5 चे उमेदवार, सुधीर अनंत साखरले, प्रभाग क्र 8 चे उमेदवार, प्रणाली सूरज शेळके, प्रभाग क्र 14 चे उमेदवार यांच्या प्रचारार्थ चार प्रभागांत रॅली काढण्यात आली. यावेळी घरोघरी जाऊन नागरिकांच्या भेटीगाठी व आशीर्वाद घेण्यात आले. जनतेतून आघाडीच्या उमेदवारांना उत्स्फूर्त प्रतिसाद मिळत असल्याचे चित्र यावेळी पहावयास मिळाले.
यावेळी काढण्यात आलेल्या प्रचारसभा व रॅलीत पालकमंत्री आदिती तटकरे, शेकाप नेते सुरेश खैरे, राष्ट्रवादी काँग्रेसच्या जिल्हाध्यक्ष गीता पालरेचा, राष्ट्रवादी सुधागड तालुका अध्यक्ष रमेश साळुंके, ग.रा.म्हात्रे, माजी सभापती साक्षी दिघे, राष्ट्रवादी सुधागड तालुका महिला अध्यक्षा रुपाली भणगे, शहर अध्यक्ष अभिजित चांदोरकर,पंचायत समिती सदस्य सविता हंबीर, शेकाप पाली शहर अध्यक्ष जनार्दन जोशी, प्रियांका पालरेचा, सुधीर साखरले, युवक जिल्हाध्यक्ष आरिफ मणियार, राकेश शिंदे, संजोग शेठ ,पप्पू परबलकर, सुनिल गायकवाड, प्रकाश आवासकर, आदींसह शेकाप व राष्ट्रवादी आघाडीचे पदाधिकारी व कार्यकर्ते मोठ्या संख्येने उपस्थित होते.
आघाडीचा जाहीरनामा
पाली शहराच्या विकासाच्या दृष्टीने शहरातील रस्ते, शुद्ध व मुबलक पाणीपुरवठा योजना, उत्तम सांडपाणी व्यवस्था, डम्पिंग ग्राउंड समस्या मार्गी लावणे, शवदाहिनी, स्मशानभूमी बांधणे, वीजसमस्या मार्गी लावणेबरोबरच शहराच्या सौंदर्यात भर घालणारी उद्याने विकसित करणे, तलावांचे सुशोभिकरण करणे, पर्यटन विकास योजनेच्या माध्यमातून शहराचा कायापालट करणे, रोजगारनिर्मितीवरदेखील भर दिला जाणार असल्याचे शेकाप- राष्ट्रवादी आघाडीच्या जाहीरनाम्यात स्पष्ट केले आहे.