भूसंपादन प्रक्रियेच्या विरोधात 1500 हरकती दाखल
| उरण | वार्ताहर |
उरणमधील सिडकोच्या आरपी झेड प्रकल्पासाठी होणार्या भू संपादनाला तालुक्यातील ग्रामस्थांनी विरोध दर्शविला आहे. सिडकोने चाणजेमधील 991, नागाव – 127, रानवड – 160, बोकडविरा – 33, पाणजे – 3, फुंडे येथील 4, नवघर मधील 2 असे एकूण 1 हजार 320 सर्व्हेनंबर मधील 366 हेक्टर जमीन संपादित करण्यासाठी (दि.12) एका वर्तमानपत्रातून जाहीर केले. त्यासाठी होणार्या भूसंपादनाला नागाव, चाणजे , रानवड, बोकडविरा, फुंडे, नवघर, पाणजे आदी. गावातील 1500 शेतकर्यांनी सिडको भवनावर धडक देत निषेध व्यक्त केला आहे. तसेच निर्णयाविरोधात 1500 हून अधिक हरकती नोंदविल्या.
1970 साली सिडकोने विकासाच्या नावाखाली उरण मधील 11 हजार हेक्टर पेक्षा अधिक जमीन संपादित केली आहे. त्यानंतर आज 52 वर्षानी पुन्हा उरण मधील उर्वरीत शेतकर्यांच्या जमिनी संपादित करण्यासाठी सिडकोने पुन्हा प्रक्रिया सुरु केली आहे. त्यामुळे उरण मधील मुळजमीन मालक, स्थानीक नागरिक पुन्हा एकदा हद्दपार होणार आहेत. अशा सिडकोच्या विविध निर्णयामुळे उरण मधील स्थानिक नागरिकांवर उपरे होण्याची वेळ आली आहे.जमीन संपादन झाल्यावर पुढे काय ? अशी भविष्याची चिंता शेतकर्यांना भेडसावत आहे.
सिडकोच्या भूसंपादनाची नोटीस प्रसिद्ध झाली होती. (दि.27) दैनिकात जाहिरात प्रसिद्ध होऊन 15 दिवस पूर्ण झाल्याने उरण विभागातील शेतकर्यांनी सिडकोच्या भूसंपादन कायद्याला विरोध करण्यासाठी व वैयक्तिक हरकती नोंदविण्यासाठी कॉ.भाऊ पाटील चौकात एकत्र आले. व तेथून सर्व शेतकरी सिडकोच्या भूसंपादन विभागाच्या कार्यालयावर धडकले. यावेळी सिडकोच्या भूसंपादन विभागात 1500 पेक्षा अधिक शेतकर्यांनी वैयक्तिक हरकती नोंदविल्या. गावठाण हक्क परिषद व चाणजे शेतकरी समितीने केलेल्या मागणीनुसार सिडको भूसंपादन व भूमापन विभागाने शेतकर्यांना हरकती नोंदविण्यासाठी आणखी 15 दिवसांची मुदतवाढ दिली आहे. शेतकर्यांनी स्वतःसाठी बांधलेली तसेच विविध विभागातील स्थानिक नागरिकांनी शेतकर्यांकडून जमिनी खरेदी करून घरांचे बांधकाम केले आहे. अशा प्रकारची हजारो घरे या जमिनीवर आहेत. सिडकोच्या या भूसंपादनाच्या प्रक्रियेमध्ये या राहत्या घरांचाही प्रश्न निर्माण झाला आहे. त्यामुळे उरणमधील शेतकरी व नागरीकांकडून या भू संपादन निर्णयाला प्रचंड विरोध असून सिडको प्रशासनाच्या या निर्णयाविरोधात प्रचंड संताप व्यक्त केला जात आहे.
यावेळी कॉ.भूषण पाटील, सुधाकर पाटील, काका पाटील , जगदीश तांडेल, संजय कडू, परिक्षीत ठाकूर, अनंत घरत, जूनूशेट थळी , काशीनाथ गायकवाड, सरपंच चेतन गायकवाड, उपसरपंच भुपेंद्र घरत, गजानन म्हात्रे, माया पाटील, सरपंच रंजना पाटील, रतन पाटील, संध्या ठाकूर, किशोर पाटील, जितेंद्र ठाकूर, एल् .जी. पाटील, अॅड. प्रदिप पाटील, दत्ता घरत, जे के म्हात्रे, राजाराम पाटील, आप्पा कडू, शरद कडू, बाळू थळी, सीताराम घरत कमळावर थळी, मोहन काठे, नयन म्हात्रे, महेश म्हात्रे, सरपंच चिंतामण पाटील, मधुसूदन म्हात्रे, माजी सरपंच केगाव महेश म्हात्रे, अरविंद घरत, कॉ. रामचंद्र म्हात्रे, कॉ संजय ठाकुर इत्यादी उरण विभागातील शेतकरी बांधव, ग्रामस्थ उपस्थित होते.