रोह्यात लोक अदालतीलीचे आयोजन

| नागोठणे | वार्ताहर |

महाराष्ट्र राज्य विधी सेवा प्राधिकरण, उच्च न्यायालय, मुंबई यांच्या आदेशावरून संपूर्ण रायगड जिल्ह्यामध्ये शनिवारी (दि.3) मार्च रोजी राष्ट्रीय लोक अदालतीचे आयोजन करण्यात आले आहे. या लोक अदालतीचा जिल्ह्यातील जास्तीत जास्त नागरीकांनी लाभ घ्यावा असे आवाहन रायगड जिल्हा व सत्र न्यायाधीश तथा अलिबाग-रायगड जिल्हा विधी सेवा प्राधिकरणचे अध्यक्ष ए.एस.राजंदेकर व न्यायाधीश तथा अलिबाग-रायगड जिल्हा विधी सेवा प्राधिकरणचे सचिव अमोल शिंदे यांनी केले आहे.

याचाच एक भाग म्हणून रोहा येथील दिवाणी व फौजदारी न्यायालयात 3 मार्चला होणार्‍या राष्ट्रीय लोक अदालतीत रोहा तालुक्यातील जास्तीत जास्त नागरिकांनी व पक्षकारांनी उपस्थित राहून सहकार्य करण्याचे आवाहन रोहा न्यायालयातील प्रथम वर्ग न्यायाधीश सुनील महाले यांनी त्यांच्या दालनात सोमवारी (दि.5) संपन्न झालेल्या बैठकीत वकील वर्गाला केले. सहन्यायाधिश मेघा हासगे व वकील वर्ग यावेळी उपस्थित होते.

या राष्ट्रीय लोक अदालतीमध्ये न्यायालयात प्रलंबित असलेली दिवाणी व तडजोडपात्र फौजदारी प्रकरणे, दिवाणी व तडजोडपात्र फौजदारी अपिले, मोटार अपघात प्रकरणे, विवाह विषयक प्रलंबित प्रकरणे तसेच ग्रामपंचायत यांच्याकडील घरपट्टी, पाणी पट्टी बिलाच्या देयकाबाबतची वादपूर्व प्रकरणे, भारत दूर संचार निगम लिमिटेड, वीजवितरण, राष्ट्रीयकृत बँका आणि पतसंस्था व इतर वित्तीय संस्था यांच्याकडील थकबाकीबाबतची वादपूर्व प्रकरणे या लोक अदालतीमध्ये तडजोडीसाठी ठेवण्यात येणार आहेत. त्यामुळेच (दि.3) मार्च रोजी होणार्‍या राष्ट्रीय लोक अदालतीमध्ये जास्तीत जास्त प्रकरणे तडजोडीने निकाली काढण्यासाठी सहकार्य करण्यास सांगण्यात आले आहे.