महाडमध्ये सासनकाठी स्पर्धेचे आयोजन

प्रत्येकाला दहा मिनिटांचा अवधी, जास्तीतजास्त वेळ काठी नाचवणारा विजेता

| महाड । प्रतिनिधी
महाराष्ट्रातील संस्कृतीत कुठलाही उत्सव, पालखी सोहळा किंवा यात्रा असो या सोहळ्यामध्ये सासनकाठी नाचवली जात नाही असे कुठेही आपणास पाहावयास मिळणार नाही. आकर्षक सजावट केलेली सासनकाठी खांद्यावर घेऊन ढोलताशा, नगारा आणि खालूबाजाच्या तालावर नाचणारे अबालवृद्ध सर्वत्र आपल्याला पाहावयास मिळतात.या सासनकाठीला साहसी खेळ म्हणून तिला वलय मिळवून देण्याचा एक छोटासा प्रयत्न महाड शहरात करण्यात आला असल्याची माहिती नवतरुण संत गोरा कुंभार समाज महाडचे अध्यक्ष कुणाल दुधगावकर यांनी दिली.महाडमधील कुंभारआळी येथे गुरुवारी सायंकाळी सासनकाठी नाचवण्याच्या अनोख्या स्पर्धेचे आयोजन करण्यात आले होते. नवतरुण संत गोराकुंभार समाज महाडतर्फे ही साहसी स्पर्धा आयोजित करण्यात आली होती.

50 फूट उंचीची ही भलीमोठी काठी नाचवण्यासाठी प्रत्येकाला दहा मिनिटांचा अवधी देण्यात आला होता त्यामध्ये नियमानुसार जास्तीतजास्त वेळ काठी नाचवणार्‍या स्पर्धकाला विजेता घोषित करण्यात आले.यामध्ये तालुक्यातून चाळीसहून अधिक स्पर्धकांनी भाग घेत उस्फुर्त प्रतिसाद दिला. स्पर्धेसाठी प्रथम क्रमांकासाठी रोख रुपये तीन हजार, द्वितीयसाठी दोन हजार व तृतीयसाठी रुपये एक हजार आणि आकर्षक चषक अशी बक्षिसे ठेवण्यात आली होती. यामध्ये दर्शन चव्हाण रा.शिरगाव याने प्रथम, सुमित माने रा.विन्हेरे द्वितीय, बंटी जाधव रा.शिरगाव तृतीय क्रमांक पटकावला. स्पर्धेचा उत्स्फूर्त प्रतिसाद पाहून आयोजकांकडून बाळकृष्ण आंबेडे रा ताम्हाणे यांना चतुर्थ तर नामदेव जाधव रा. रावतळी यांना पाचवा क्रमांक अशी दोन वाढीव बक्षीसे देण्यात आली.

सर्व विजेत्यांना उपस्थित मान्यवरांच्या हस्ते बक्षीस वितरण करण्यात आले. अनेक मान्यवरांनी यावेळी या स्पर्धेत भेट देऊन ही स्पर्धा पाहण्याचा आनंद घेतला. यावेळी विकास गोगावले, नितीन पावले, निखिल शिंदे, सिद्धेश पाटेकर, नितीन आर्ते, सुनील अगरवाल, अमित शेट्टी आदी मान्यवर उपस्थित होते. स्पर्धेसाठी परीक्षक म्हणून नाना गायकवाड व दीपक सकपाळ यांनी चोख भूमिका बजावली. सुभाष शिरशिवकर,सुदेश कळमकर,दीपक चव्हाण,सुनील महाडकर,सुदेश शिरशिवकर,राजा विन्हेरकर,नाना नातेकर, सुरज चाडवेकर, तुषार महाडकर, योगेश विन्हेरकर, चंद्रकांत नातेकर यांनी सहकार्य केले.