मांगुर पालनामुळे पाताळगंगा प्रदूषित

तलावातील दुर्गंधीयुक्त पाणी नदीत; मृत मासे जाळल्याने परिसरात दुर्गंधी

| खोपोली | प्रतिनिधी |

पाताळगंगा नदीला रासायनिक प्रदूषणाचा विळखा असतानाच आता नदीकिनारी सुरू असलेल्या कथित बेकायदेशीर मांगुर मासेपालनामुळे प्रदूषणात आणखी भर पडत असल्याची तक्रार स्थानिकांकडून होत आहे. महड, धामणी, पौध, कोपरी आणि मोहपाडा परिसरात मोठ्या प्रमाणात मांगुर मासेपालनासाठी तलाव तयार करण्यात आले असून, या तलावांतील दुर्गंधीयुक्त पाणी ठराविक कालावधीनंतर नदीपात्रात सोडले जात असल्याचा आरोप करण्यात येत आहे.

मांगुर माशांना खाद्य म्हणून प्रामुख्याने कोंबड्यांचे टाकाऊ अवशेष वापरले जात असल्याचे स्थानिकांचे म्हणणे आहे. हे खाद्य तलावात कुजल्याने पाणी मोठ्या प्रमाणात दूषित होऊन दुर्गंधी निर्माण होते. तलावापासून सुमारे एक ते दीड किलोमीटरपर्यंत या दुर्गंधीचा त्रास जाणवत असल्याचे नागरिक सांगतात. पावसाने सध्या विश्रांती घेतल्याने पाताळगंगा नदीची पाणीपातळी कमी झाली आहे. त्यामुळे नदीकिनारी असलेल्या तलावांमधून येणाऱ्या दुर्गंधीचा त्रास अधिक तीव्रतेने जाणवत असल्याचे नागरिकांचे म्हणणे आहे. त्यातच तलावातील मृत मासे जाळले जात असल्याने महड गाव, मंदिर परिसर, खालापूर, सावरोली पूल आणि धामणी परिसरात हवेतून दुर्गंधी पसरत आहे.

पाण्याच्या वापरामुळे आरोग्याचा प्रश्न
पाताळगंगा नदीचे पाणी परिसरातील नागरिकांकडून विविध दैनंदिन गरजांसाठी वापरले जाते. त्यामुळे दूषित व दुर्गंधीयुक्त पाणी नदीत मिसळत असल्यास त्याचा नागरिकांच्या आरोग्यावर परिणाम होण्याची भीती व्यक्त केली जात आहे. साथीचे आजार पसरण्याची शक्यताही नागरिकांकडून व्यक्त होत आहे. मांगुर पालनावर बंदी असल्याचे सांगितले जात असतानाही नदीकिनारी मोठ्या प्रमाणावर त्याचे संवर्धन सुरू असल्याचा आरोप होत आहे. या प्रकारामुळे नदीच्या प्रदूषणात भर पडत असताना संबंधित यंत्रणांचे दुर्लक्ष होत असल्याने स्थानिकांमध्ये नाराजी व्यक्त होत आहे. प्रदूषण नियंत्रण मंडळ, रायगड आणि मत्स्य विभागाने या संपूर्ण प्रकाराची तातडीने पाहणी करून मांगुर पालन करणाऱ्या तलावांची तपासणी करावी, तसेच तलावातील पाणी नदीपात्रात सोडले जात आहे का, मृत मासे कुठे व कशा पद्धतीने नष्ट केले जातात, याची चौकशी करावी, अशी मागणी नागरिकांकडून होत आहे.