पत्राचाळ प्रकरण! शरद पवारांचे शिंदे सरकारला आव्हान

। मुंबई । प्रतिनिधी ।

पत्राचाळ घोटाळा प्रकरणी राष्ट्रवादी काँग्रेसचे अध्यक्ष शरद पवार यांनी राज्य सरकारला आव्हान दिलं आहे. या प्रकरणी चौकशी करायची असेल तर लवकरात लवकर करा. पण, जर आरोप खोटे ठरले तर काय कराल हे ही सरकारने स्पष्ट करावं, असंही पवार म्हणाले आहेत.

पत्राचाळ घोटाळा प्रकरणात नवीन खुलासे होत असतानाच ईडीने राष्ट्रवादी काँग्रेसचे अध्यक्ष शरद पवार यांच्या सहभागाची कालबद्ध मर्यादेत चौकशी करावी, अशी मागणी भाजपचे आमदार अतुल भातखळकर यांनी केली होती. अतुल भातखळकर यांनी ही मागणी गृहमंत्री देवेंद्र फडणवीस यांच्याकडे केली होती. पत्राचाळीच्या भ्रष्टाचाराचा आवाका पाहाता हे प्रकरण फक्त संजय राऊत यांना झेपणारे आहे, असे सुरुवातीपासून वाटत नव्हते, असेही भातखळकर यांनी म्हटलं होतं. याबाबत पत्र लिहून पत्राचाळ घटनेची सखोल चौकशी व्हावी, अशी मागणी भातखळकर यांनी केली होती.

भातखळकर यांनी यासंबधी एक ट्वीट देखील केलं होतं. यामध्ये त्यांनी म्हटलं होतं की, पत्राचाळ प्रकरणी राष्ट्रावादी काँग्रेसचे अध्यक्ष शरद पवार यांची चौकशी व्हावी, ईडीच्या आरोपपत्रात हे नाव आहे. याप्रकरणी तत्काळ चौकशी व्हावी, असं ट्विट अतुल भातखळकर यांनी केलं होते.