जेएनपीएकडून थकित मालमत्ता कर अदा
| उरण । वार्ताहर ।
मागील अनेक वर्षांपासून सुरू असलेल्या संघर्षानंतर जेएनपीएने 11 पैकी जसखार, नवघर, करळ-सावरखार, जासई या चार ग्रामपंचायतींना थकित असलेल्या मालमत्ता कराची नऊ कोटी 63 लाख 80 हजार 678 रुपये सोमवारी अदा करण्यात आली असल्याची माहिती जेएनपीएचे वरिष्ठ प्रबंधक जयंत ढवळे यांनी दिली आहे.
प्रकल्पबाधीत जसखार, सोनारी, करळ-सावरखार, फुंण्डे, डोंगरी,पाणजे, बोकडवीरा, नवीन शेवा, हनुमान कोळीवाडा,पागोटे, नवघर आदी 11 ग्रामपंचायतींचा सुमारे कोट्यावधी रुपयांचा मालमत्ता कर थकविला आहे. मागील अनेक वर्षांपासून कोट्यावधी रुपयांच्या थकलेल्या मालमत्ता करामुळे मात्र 11 ग्रामपंचायतीचा विकास पुरता थंडावला आहे. मालमत्ता कराची रक्कम वसूल करण्यासाठी 11 ग्रामपंचायतींच्या माध्यमातुन जेएनपीटी प्रकल्पग्रस्त ग्रामपंचायत समितीचा संघर्ष सुरू असल्याची माहिती निमंत्रक तुकाराम कडू यांनी दिली आहे.
प्रकल्पग्रस्त ग्रामपंचायत समितीच्या संघर्षानंतर चार ग्रामपंचायतींच्या मालमत्ता कराची रक्कम जेएनपीएचे अध्यक्ष संजय सेठी, उपाध्यक्ष उन्मेष वाघ, मनिषा जाधव यांच्या उपस्थितीत अदा केली आहे. जसखार ग्रामपंचायत दोन कोटी 36 लाख 69 हजार 772, नवघर-59 लाख 82 हजार 770,करळ-सावरखार चार कोटी 83 लाख 55 हजार 659,जासई एक कोटी 83 लाख 72 हजार 477 अशी चार ग्रामपंचायतीची थकित असलेल्या मालमत्ता कराची नऊ कोटी 63 लाख 80 हजार 678 रुपये अदा करण्यात आली.
उर्वरित सात ग्रामपंचायतींची मालमत्ता कराच्या थकित असलेल्या 25 ते 35 कोटींच्या रकमेच्या वसुलीसाठी प्रयत्न सुरु असल्याची माहिती जेएनपीटी प्रकल्पग्रस्त ग्रामपंचायत समितीचा संघर्ष सुरू असल्याची माहिती तुकाराम कडू यांनी दिली.
