| पेण | प्रतिनिधी |
मुंबई, ठाणे, नवी मुंबई, कर्जत, माथेरान, महाबळेश्वर, अलिबाग या ठिकाणातील फार्म हाऊस खिशाला परवडत नसल्याने अनेक आंबट शौकिनांची पेण येथील फार्म हाऊसकडे येण्याची संख्या गेल्या दोन वर्षांत वाढली आहेत. त्यातच नाताळपासून 31 डिसेंबरपर्यंत या फार्म हाऊसवर हाऊसफुल्ल गर्दी असते. या पार्श्वभूमीवर पेण तालुक्यातील पूर्व भागातील व पाबळ खोर्यातील फार्म हाऊसवर अवैधरित्या दारू, गांजा, चरस, असे आंबट शौकिनांची नशा वाढवणार्या पदार्थांची रेलचेल वाढत असल्याचा संशय खाकीला आल्याने पोलीस यंत्रणा सतर्क झाली आहे. त्यातच परवाना नसताना अनधिकृत ढाबे, चायनिज सेंटर, हॉटेल यामध्येदेखील खुलेआम मद्यविक्री केली जात असल्याची चर्चा असून, यावरही उत्पादन शुल्क विभागाची बारीक नजर राहणार आहे.
त्यातच कोणत्याही फार्म हाऊसवर दारू विक्री अथवा पिण्यास सक्त मनाई असताना पूर्व विभागातील एका प्रसिद्ध वॉटरपार्कमध्ये सर्रास दारूची विक्री होत असल्याची माहिती पोलिसांना मिळालेली आहे. त्यातच त्या वॉटर पार्कवर रात्रीच्या वेळी मुजर्याचे कार्यक्रमसुद्धा होत असल्याने कळत-नकळत चरस, गांजा सेवन करणारे आंबट शौकीन मोठ्या प्रमाणात पूर्व विभागात येतात. एकंदरीत, रम-रमा-रमीची रेलचेल पूर्व विभागातील फार्म हाऊसमध्ये होणार यात काही शंकाच नाही. त्यामुळे खाकीवाल्यांनी यावेळेला या आंबट शौकिनांबरोबर अमली पदार्थ विक्री करणार्या टोळक्यांवरदेखील बारीक नजर ठेवली आहे.
खरंच कारवाई होणार?
खाकीचा विशेष दस्त तयार झाला असून, या दस्ताच्या माध्यमातून या फार्म हाऊस मालकांवर व बड्या बापांच्या धेंड्यांवर तसेच आंबट शौकिनांवर कायदेशीर कारवाई होणार यात काही शंका नाही. त्यामुळे जिल्ह्यातील खाकी आता अलर्ट मोडवर असल्याने थर्टी फर्स्टच्या नावाने होत असणारा नंगा नाच थांबणार असेच काहीसे चित्र दिसत आहे. परंतु, हे चित्र थांबणार की वाढणार, हा येणारा काळच ठरवेल.