नैना प्रकल्पातील भूधारकांना भूखंडाचा ताबा
| पनवेल | प्रतिनिधी |
सिडकोच्या नैना प्रकल्पातील परियोजना क्र. 2 अंतर्गत येणार्‍या चिपळे, विहीघर, देवद, भोकरपाडा, वेलवली व सांगाडे गावातील भूधारकांना लवादांकडून निश्‍चित केल्याप्रमाणे अंतिम भूखंडाचा ताबा दि. 12 मे रोजी हस्तांतरित करण्यात आला. एकूण 92 हजार स्के. मी. क्षेत्रफळाचे अंतिम भूखंडाचा ताबा भूधारकांना यशस्वीरित्या प्रदान करण्यात आला. नैना प्रकल्पाची सुरूवात झाल्यापासून प्रथमतःच परियोजना क्र. 2 अंतर्गत येणार्‍या गावांतील खातेदारांना भूखंडाचे वाटप करण्यात आले आहे. हा प्रकल्प प्रत्यक्ष नावारूपास येण्याच्या दृष्टीने हे एक महत्त्वाचे व सकारात्मक पाऊल आहे. नैना प्रकल्पातील शेतकर्‍यांनी वेळोवेळी केलेल्या सहकार्यामुळेच सिडकोकडून हा प्रकल्प दृष्टिक्षेपात आणण्यास मदत होत आहे.
सदर भूखंड वाटप समाधान खटकाळे, मुख्य भूमी व भूमापन अधिकारी (नैना) यांच्या निरीक्षणाखाली व सुरेश मेंगडे, (मुख्य दक्षता अधिकारी) यांच्या उपस्थितीत यशस्वीरित्या व शिस्तबद्ध वातावरणात पार पडला. भविष्यात नवी मुंबई आंतरराष्ट्रीय विमानतळाच्या सभोवतालची बेसुमार वाढ रोखण्याच्या अनुषंगाने नैना प्रकल्पाचे नियोजन करण्यात आले. नैना प्रकल्प हा 371 चौ.कि.मी. क्षेत्रफळावर साकारला जात असून, या प्रकल्पांतर्गत जमीन मालकांना त्यांच्या मूळ जमिनीच्या 40 टक्क्यांपर्यंत विकसित जमिनी देऊन त्यांना विकासात भागीदार बनवले जाते. उर्वरित 60 टक्के जमिनीचा वापर भौतिक आणि सामाजिक पायाभूत सुविधा निर्माण करण्यासाठी केला जातो. यामध्ये किमान जमिनीचा वापर पायाभूत सुविधांच्या विकासाससोबतच वित्त उभारणी व व्यावसायिक वापरासाठीदेखील केला जातो. यासोबतच शहरी वनीकरणाला देखील या योजनेच्या माध्यमातून प्रोत्साहन दिले गेले आहे. सिडकोने विकास करताना नेहमीच भूधारकांचा सर्वांगिण विचार केला आहे. प्रकल्पाच्या विकासासोबतच यातून भूधारकांचेदेखील जीवनमान उंचावणार आहे. त्यांना देखील त्यांचे उज्ज्वल भविष्य साकारण्याची संधी मिळणार आहे.
