‘आयडिया व्हिडिओ’बद्दल सविस्तर चर्चा
| उरण | प्रतिनिधी |
रायगड जिल्ह्यातील उरण तालुक्यातील पाले आणि सारडे गावाला नुकतीच निपुण भारत अंतर्गत चालत असलेल्या माता गटांसोबत हितगूज करण्यासाठी प्रथम एज्युकेशन फाऊंडेशनची आंतरराष्ट्रीय पातळीवर काम करणाऱ्या टीमने भेट दिली. प्रत्यक्ष गावात जाऊन माता गट पाहून त्यांच्यासोबत चर्चा केली. निपुण भारत अंतर्गत येत असलेल्या आयडिया व्हिडिओ आणि पहिले पाऊलच्या आयडिया व्हिडिओ यांचा मुलांना आणि मातांना कशा प्रकारे उपयोग होत आहे, याबद्दल सविस्तर चर्चा करण्यात आली.
गटातील प्रत्येक माताने त्यांना आयडिया व्हिडिओचा उपयोग मुलांना शिकविण्यासाठी कशा प्रकारे होत आहे, याबद्दल अनुभव सांगितले. माता अशा म्हणत होत्या की, आम्हाला पूर्वी वाटायचे मुलं फक्त शाळेतच शिकतातद्ध परंतु या आयडिया व्हिडिओमुळे आमचा आत्मविश्वास तर वाढलाच व मुले घरातही परिसरातून चांगल्या प्रकारे शिक्षण घेऊ शकतात याची प्रत्यक्ष अनुभूती मिळाली. या आयडिया व्हिडिओचा आम्हाला आमच्या दैनंदिन जीवनात ही खूप छान उपयोग होत आहे. आलेल्या व्हिडीओमध्ये गुड टच-बॅड टच, मुलांचे आरोग्य, मुलांचे संतुलित आहार त्याचबरोबर घरातील, परिसरातील वस्तूंच्या सहाय्याने आम्हाला मुलांना शिकवायचे कसे हे समजत असल्याचे उपस्थित मातांनी सांगितले. सारडे गावातील मातांना प्रथम टीम च्या उबाताई राणे यांनी छान असे मार्गदर्शन केले.
या भेटीच्या वेळी प्रथम एज्युकेशन फाऊंडेशन आंतरराष्ट्रीय टीमच्या मीरा तेंडुलकर, मीनल जोशी, उषा राणे, हेमलता ससाणे, सोहेल मेंमोन, वसंत मकवाना, तसेच पाले गावचे सरपंच निरा पाटील, माजी उपसरपंच समाधान म्हात्रे, शाळा व्यवस्थापन कमिटी सर्व सदस्य, सारडे सरपंच रोशन म्हात्रे, उरण गटशिक्षणाधिकारी प्रियांका म्हात्रे व पंचायत समितीची टीम, डायट अधिव्याख्याता संतोष दौड, पाले शाळेचे मुख्याध्यापक उपेंद्र ठाकूर आणि सहशिक्षिका पुष्पलता म्हात्रे, कोप्रोली केंद्र प्रमुखा आणि सारडे शाळेच्या मुख्याध्यापिका उर्मिला म्हात्रे, शाळेचे शिक्षक कौशिक ठाकूर, सुनील नऱ्हे आदी उपस्थित होते. तसेच उरण प्रथम टीमला कोकण झोन प्रोग्राम हेड भोजराज क्षीरसागर वेळोवेळी मार्गदर्शन करत आहेत.