रायगडावरील तयारी अंतिम टप्प्यात

मंत्री गोगावलेंकडून प्रमुख विभागांची आढावा बैठक

। महाड । प्रतिनिधी ।

शिवपुण्यतिथी निमित्ताने केंद्रीय गृहमंत्री अमित शहा यांच्या 12 एप्रिल रोजी होणार्‍या किल्ले रायगड दौर्‍याची तयारी अंतिम टप्प्यात आली आहे. या कार्यक्रमाच्या पार्श्‍वभूमीवर बुधवार, दि. 9 एप्रिल रोजी शासकीय विश्रामगृह महाड येथे राज्याचे रोजगार हमी खात्याचे मंत्री भरत गोगावले यांच्या प्रमुख उपस्थितीत सर्व प्रमुख विभागांची आढावा बैठक घेण्यात आली.

या बैठकीला जिल्हाधिकारी किशन जावळे, जिल्हा पोलीस अधीक्षक सोमनाथ घार्गे, महाडचे प्रभारी प्रांताधिकारी राजकुमार सानप, तहसीलदार महेश शितोळे, गटविकास अधिकारी डॉ. स्मिता पाटील इत्यादी प्रमुख अधिकार्‍यांसह केंद्रीय पुरातत्व विभाग, सार्वजनिक बांधकाम विभाग, जिल्हा परिषद, वन विभाग, महावितरण, पंचायत समिती, पोलीस दल, महसूल विभाग, राज्य परिवहन, पशुवैद्यकीय विभाग, आरटीओ, रायगड रोपवे प्रशासन, आरोग्य विभाग, नगरपरिषद प्रशासन, पाणीपुरवठा विभाग यांसह अन्य शासकीय, प्रशासकीय विभागांचे प्रमुख प्रतिनिधी या बैठकीला उपस्थित होते. मंत्री गोगावले यांनी प्रत्येक विभागाकडून रायगडच्या पायथ्यापासून ते प्रत्यक्ष गडावर होणार्‍या संपूर्ण कार्यक्रमाच्या नियोजनाचा आढावा घेतला.

यामध्ये वाहनतळ, एसटी गाड्यांचे जाण्या-येण्याचे नियोजन, प्रमुख व आवश्यक ठिकाणी वीजपुरवठा, पिण्याचे पाण्याचे नियोजन, रोपवेच्या वापराच्या वेळा, गडाचा पायथा ते गडावरील कार्यक्रमा दरम्यानची आरोग्य सुविधा, तात्पुरती होणारी हेलिपॅड निर्मिती, रस्ते व दळणवळणाचे नियोजन या प्रमुख मुद्द्यांवर चर्चा करून यातील त्रुटी व समस्यांवर तातडीने उपाययोजना करण्याचे निर्देश मंत्री गोगावले यांनी सर्व अधिकार्‍यांना बैठकीदरम्यान दिले. या बैठकीला सर्व विभागातील अधिकारी व कर्मचारी मोठ्या संख्येने उपस्थित होते. यावेळी मंत्री भरत गोगावले यांनी माध्यमांशी संवाद साधून या बैठकीची सविस्तर माहिती दिली.
दरम्यान, रायगड किल्ल्यावरील कार्यक्रमास प्रमुख पाहुणे म्हणून केंद्रीय गृहमंत्री आणि सहकार मंत्री अमित शाह, मुख्यमंत्री देवेंद्र फडणवीस व उपमुख्यमंत्री एकनाथ शिंदे, उपमुख्यमंत्री अजित पवार यांच्यासह अनेक मंत्री, खासदार व आमदार उपस्थित राहून अभिवादन करणार आहेत. केंद्रीय गृहमंत्री शहा सकाळी 11 वा रायगड येथे उपस्थित राहणार आहेत.

कार्यक्रमात श्री शिवपुष्पस्मृती रायगड पुरस्कार दुर्ग अभ्यासक निलकंठ रामदास पाटील यांना प्रदान करण्यात येणार आहे. तसेच सैन्यदल अधिकारी ले.जन. संजय कुलकर्णी यांचा सन्मान व सरदार घराणे सन्मान, पुण्यश्‍लोक अहिल्यादेवी होळकर यांचे वंशज उदयसिंगजी होळकर यांचा सत्कार करण्यात येणार आहे.

अभिवादन कार्यक्रमाचे आयोजन
छत्रपती शिवाजी महाराज यांच्या 345 व्या पुण्यतिथीच्या निमित्ताने शनिवार दि. 12 एप्रिल रोजी रायगड किल्ल्याावर सकाळी 11 वाजता विविध कार्यक्रमांचे आयोजन करण्यात आले आहे. यामध्ये राजदरबारात शिवप्रतिमा पूजन, सैन्यदल अधिकारी आणि सरदार घराणे सन्मान, गडरोहण स्पर्धा बक्षीस वितरण सोहळा, शिवपुण्यस्मृती रायगड पुरस्कार वितरण, शिवरायमुद्रा स्मरणिका प्रकाशन असे विविध कार्यक्रम संपन्न होणार आहेत.

ड्रोन व हवाई उपकरणांवर बंदी
केंद्रीय गृहमंत्री अमित शहा किल्ले रायगड व सुतारवाडी येथे देणार आहेत. या दौर्‍याच्या पार्श्‍वभूमीवर जिल्हाधिकारी किशन जावळे यांनी सुरक्षा कारणास्तव सकाळी 7 ते दुपारी 4 या वेळेत 2 कि.मी. परिसरात ड्रोन, पॅराग्लायडर, पॅरामोटर्स, हॅडग्लायडर्स इत्यादींच्या वापरावर बंदी घातली आहे. या आदेशाचे उल्लंघन केल्यास कारवाई करण्यात येणार येईल असे जिल्हाधिकारी जावळे यांनी कळविले आहे.