पालीत महावितरणची तत्पर सेवा

| सुधागड-पाली | वार्ताहर |

पाली शहरात विद्युत सेवा सुधारण्यासाठी महावितरण विभागाकडून दोन सकारात्मक निर्णय घेतले गेले आहेत, जे नागरिकांच्या सुविधेसाठी मोलाचे ठरले आहेत. पहिल्या घटनेत, पाली शहरातील स्मशानभूमीकडे वीज पुरवठा करणारा ट्रान्सफॉर्मर सोमवार सकाळी 10 वाजता अचानक नादुरुस्त झाला.

परिस्थिती गंभीर होण्याआधीच महावितरणच्या अधिकाऱ्यांनी तात्काळ नवीन ट्रान्सफॉर्मर बसवून वीज सेवा पूर्ववत केली. यावेळी नागरिकांची कोणतीही गैरसोय होऊ न दिल्याने अधिकारी वर्गाचे कौतुक होत आहे. दुसऱ्या महत्त्वपूर्ण निर्णयामध्ये, पाली उच्च दाब वहिनीवर देऊळवाडा परिसरात नवीन ए.बी. स्विच कार्यान्वित करण्यात आली आहे. त्यामुळे भविष्यात देऊळवाडा परिसराच्या पुढे कुठलाही तांत्रिक बिघाड झाला तरी संपूर्ण शहराचा वीजपुरवठा बंद न करता केवळ संबंधित भागातच दुरुस्ती केली जाऊ शकते. हे तंत्रज्ञान शहराच्या कार्यक्षमतेसाठी मैलाचा दगड ठरणार आहे. महावितरणचे संबंधित अधिकारी रुजू झाल्यापासून तालुक्यातील विविध तांत्रिक अडचणींवर युद्धपातळीवर काम सुरू असून, लोकसेवेसाठी तत्पर आणि योजनाबद्ध दृष्टिकोन नागरिकांच्या सुखद अनुभवात भर घालत आहे. ही सुधारणा म्हणजे केवळ तांत्रिक प्रगती नाही, तर नागरिकांच्या दैनंदिन जीवनात दिलासा देणारी परिवर्तनाची पावले आहेत.