शेकापचे हजारो कार्यकर्ते उद्या मुंबईत धडकणार

निवडणूक आयोगाच्या कार्यपध्दतीसह एसआयआर प्रक्रियेविरोधात आंदोलन; शेकाप नेते जयंत पाटील यांची माहिती

| रायगड | जिल्हा प्रतिनिधी |

निवडणूक आयोगाच्या कार्यपध्दतीबरोबरच एसआयआर अर्थात विशेष सखोल पुनरीक्षण मतदार याद्यांच्या प्रक्रियेविरोधात ठाकरे बंधू यांच्या नेतृत्वाखाली मुंबईत मोठा संयुक्त मोर्चा आयोजित केला आहे. या आंदोलनाला शेतकरी कामगार पक्षाने पाठिंबा दर्शविला असून तीन हजारहून अधिक कार्यकर्ते मुंबईत रविवारी (दि.4) धडकणार असल्याची माहिती शेकाप सरचिटणीस जयंत पाटील यांनी दिली. अलिबाग तालुकासह, पनवेल व वेगवेगळ्या भागातील असंख्य कार्यकर्ते या मोर्चात सहभागी होतील असा विश्वास त्यांनी व्यक्त केला.

शेकाप नेते जयंत पाटील यांनी शनिवारी (दि.3) अलिबागमध्ये पत्रकार परिषदेतून ही माहिती दिली. यावेळी शेकाप प्रवक्त्या चित्रलेखा पाटील, महिला आघाडी प्रमुख ॲड. मानसी म्हात्रे, कामगार आघाडी प्रमुख प्रदिप नाईक, तालुका चिटणीस सुरेश घरत, शेकाप जिल्हा चिटणीस मंडळाचे सदस्य अनिल पाटील, माजी तालुका चिटणीस अनिल पाटील, शेतकरी संघटनेचे अनिल गोमा पाटील, निलेश खोत, सुरेश पाटील, तालुका सहचिटणीस नरेश म्हात्रे, रायगड बाजारचे उपाध्यक्ष प्रमोद घासे आदी वेगवेगळ्या आघाडीचे पदाधिकारी उपस्थित होते.

यावेळी जयंत पाटील म्हणाले की, देशामध्ये मतदार याद्यांमध्ये मोठा घोटाळा होत आहे. मतदारांची नावे कमी करण्याचा घाट घातला जात आहे. विरोधकांचे मतदार कमी करण्याचा प्रयत्न सुरु आहे. याला निवडणूक आयोग सामील आहेत. निवडणूक आयोग दादागिरी करून एक वेगळ्या पध्दतीने एकतर्फी राजकीय वातावरण निर्माण करण्याचा प्रयत्न करीत आहे. निवडणूक आयोगाच्या कार्यपध्दतीसह एसआयआर प्रक्रियेतील गैरकारभाराबाबत रविवारी (दि.4) मुंबईत सकाळी मोर्चा काढला जाणार आहे. ठाकरे बंधूच्या नेतृत्वाखाली हा लढा सुरु करण्यात आला आहे. वेगवेगळ्या पक्षातील पदाधिकारी व कार्यकर्ते या आंदोलनात सहभागी होणार आहेत. त्यामुळे या मोर्चामध्ये सहभागी होण्याचा निर्णय शेतकरी कामगार पक्षानेदेखील घेतला आहे. सकाळी साडेअकरा सुरु होणाऱ्या या आंदोलनात रायगड जिल्ह्यातून जास्तीत जास्त कार्यकर्ते सहभागी व्हावे, याचे नियोजन केले आहेत. वेगवेगळ्या पक्षातील कार्यकर्त्यांसह सर्वसामान्य नागरीकदेखील या आंदोलनात सहभागी होणार आहेत. 1975नंतर झालेल्या आणि बाणीचे वातावरण सध्या राज्यासह देशात सुरु असल्याचे दिसून येत आहे. निवडणूक आयोगाच्या कार्यपध्दतीसह मतदार याद्यांमधील घोळांविरोधात उद्या होणाऱ्या आंदोलनाची क्रांती आज घराघरात दिसून येत आहे. सरकारच्या भूमिकेविरोधात सर्वसामान्य जनता रस्त्यावर येऊ लागली आहे. उद्या होणाऱ्या मोर्चात रायगड जिल्ह्यातून सुमारे तीन हजारहून अधिक कार्यकर्ते सहभागी होणार आहेत. कार्यकर्त्यांनी मोठ्या संख्येने या आंदोलनात सहभागी व्हावे, असे आवाहन जयंत पाटील यांनी केले आहे.

मतांचा अधिकार काढला जात आहे. विरोधकांचे मतदार निवडून बाहेर काढली जात आहेत. विशिष्ट धर्म, जातीची मते कमी करण्याचा घाट सुरु आहे. सर्वसामान्य मागास घटकाला मतदानाच्या हक्कापासून वंचित ठेवण्याचा प्रयत्न केला जात आहे. हरकती व दाव्यांसाठी ज्या मतदारांना नोटीसा बजावण्यात आल्या आहेत. तो दावे, हरकतीचा कालावधी अत्यल्प आहे. सरकारी यंत्रणेकडून जी मोहीम सुरु आहे. ती अत्यंत्य वाईट आहे. ज्ञानेश कुमार यांनी राजीनामा द्यावा तसेच त्यांच्याविरोधात कारवाई करण्यात यावी अशी मागणी आहे.

– चित्रलेखा पाटील,  शेकाप प्रवक्त्या