गळ्यातील मंगळसूत्र खेचून चोरटा पसार

| माणगाव | वार्ताहर |

माणगाव बाजारपेठेतील अनंत बिल्डिंगमधील बँक ऑफ इंडियाच्यावर असलेल्या घराकडे जाण्यासाठी पायऱ्या चढून जात असताना एका महिलेच्या गळ्यातील सुमारे तीन तोळे वजनाचे मंगळसूत्र खेचून अज्ञात चोरटा फरार झाला आहे. सदरची घटना गुरुवार (दि.18) रोजी सायंकाळी 5:15 वाजण्याच्या सुमारास घडली. याबाबतची फिर्याद सुषमा अशोक मेथा (वय-60) रा. दत्तनगर ता. माणगाव यांनी माणगाव पोलीस ठाण्यात दिली.

सदर घटनेबाबत माणगाव पोलीस सूत्रांकडून मिळालेली माहिती अशी कि, घटनेतील फिर्यादी सुषमा अशोक मेथा या त्यांची बहीण पुष्पलता अमृत दोषीसह चुलत बहीण मंगल शेठ हिला भेटण्यासाठी जाण्यासाठी बिल्डिंगच्या पायऱ्या चढत असताना फिर्यादी यांच्या पाठीमागून एक अज्ञात चोरटा हा जिना चढून पुढे वर गेला. त्यानंतर त्याने परत चार-पाच पायऱ्या चढून पुन्हा माघारी आला व फिर्यादी यांच्या गळ्यातील 1 लाख 60 हजार रुपये किमतीचे एक पेडन असलेले व दोन्ही बाजूस सोन्याची साखळी व त्यामध्ये काळे मणी असलेले तीन तोळे वजनाचे जुने वापरते मंगळसूत्र खेचून अज्ञात चोरटा फरार झाला आहे. या अज्ञात आरोपी चोरट्याचे वर्णन वय अंदाजे 40 वर्ष असून रंगाने सावळा, अंगाने मध्यम, अंगामध्ये खाकी रंगाचा शर्ट, केस बारीक असे आहे. या घटनेची नोंद माणगाव पोलीस ठाण्यात दाखल करण्यात आली आहे. सदर घटनेचा अधिक तपास पोलीस निरीक्षक राजेंद्र पाटील यांच्या मार्गदर्शनाखाली पोलीस उपनिरीक्षक श्री. आघाव हे करीत आहेत.