लाखभर मतदारांच्या नोंदींवर प्रश्नचिन्ह

एसआयआरच्या धावपळीत पनवेलकरांची तारांबळ; लहान मुलांसह ज्येष्ठ नागरिकांच्या लांबच लांब रांगा

| पनवेल | प्रतिनिधी |

मतदार यादीतील नोंदींच्या विशेष सखोल पुनरीक्षणाने (एसआयआर) पनवेलकरांची चांगलीच धावपळ उडाली आहे. सुमारे दीड लाख मतदारांच्या नोंदींमध्ये बदल किंवा दुरुस्तीची आवश्यकता निर्माण झाल्याचे सांगितले जात असून, त्यापैकी सुमारे 27 हजार मतदारांना नोटिसा बजावण्यात आल्या आहेत. त्यामुळे कागदपत्रे घेऊन संबंधित केंद्रांवर पोहोचणाऱ्या नागरिकांची संख्या वाढली असून, लहान मुलांसह पालक आणि ज्येष्ठ नागरिकांच्या लांबच लांब रांगा लागल्याचे चित्र आहे.

नाव, पत्ता, नातेवाईकांची माहिती किंवा जुन्या मतदार यादीतील नोंदींमध्ये तफावत आढळल्यास मतदारांकडून कागदपत्रे मागवली जात आहेत. त्यामुळे ‌‘मतदानाचा अधिकार बजावण्यासाठी नव्हे, तर मतदार यादीत आपले नाव असल्याचे सिद्ध करण्यासाठीच धावपळ‌’ अशी भावना काही नागरिकांनी व्यक्त केली.
एसआयआर प्रक्रियेत बूथ लेव्हल अधिकाऱ्यांकडून (बीएलओ) घरोघरी जाऊन माहिती घेणे, गणना अर्ज देणे व स्वीकारणे अपेक्षित होते. मात्र, प्रत्यक्ष प्रक्रियेत नागरिकांना कागदपत्रांसाठी केंद्रांवर यावे लागत असल्याने प्रशासनाच्या कार्यपद्धतीवर प्रश्न उपस्थित होत आहेत.

ज्येष्ठ नागरिकांना तासन्‌‍‍तास रांगेत उभे राहावे लागत असून, नोकरी-व्यवसाय करणाऱ्या तरुणांना कामातून वेळ काढावा लागत आहे. लहान मुलांना सोबत घेऊन आलेल्या पालकांचीही मोठी गैरसोय होत आहे. त्यामुळे ‌‘मतदारांच्या सोयीसाठी असलेली यंत्रणा मतदारांनाच कार्यालयाच्या दारात का उभी करते?‌’ असा सवाल नागरिकांकडून केला जात आहे.

दरम्यान, निवडणूक आयोगाने महाराष्ट्रातील दावे व हरकती दाखल करण्याची मुदत 12 ऑक्टोबरपर्यंत वाढवली असून, त्यावरील कार्यवाहीची मुदत 10 नोव्हेंबरपर्यंत करण्यात आली आहे. अंतिम मतदार यादी 16 नोव्हेंबर 2026 रोजी प्रसिद्ध होणार आहे. तसेच, नव्या सूचनेनुसार नोटीस मिळालेल्या अनेक मतदारांना प्रत्यक्ष कार्यालयात सुनावणीसाठी येण्याची आवश्यकता नसून, बीएलओंकडून कागदपत्रे घरून घेण्याची व्यवस्था करण्यात आली आहे.

मतदारांनी काय करावे?
नोटीस मिळालेल्या मतदारांनी घाबरून न जाता आपले नाव प्रारूप मतदार यादीत तपासावे आणि आवश्यक कागदपत्रे तयार ठेवावीत. नाव, पत्ता किंवा इतर तपशीलात दुरुस्ती असल्यास निर्धारित मुदतीत दावा किंवा हरकत नोंदवावी. एसआयआरसाठी निवडणूक विभागाने मतदारांना नाव तपासणे आणि आवश्यक प्रक्रिया पूर्ण करण्याची सुविधा उपलब्ध करून दिली आहे.