एकाला अटक, संवेदनशील वस्तू जप्त
| पुणे | वृत्तसंस्था |
पुणे शहरातील वानवडी परिसरात ‘इसिस’ या दहशवादी संघटनेशी संबंध असल्याच्या संशयावरून राष्ट्रीय तपास संस्थेने (एनआयए) एका घरावर छापेमारी केली. याप्रकरणी पोलिसांनी एका संशयित आरोपीला अटक केली असून, काही कागदपत्रं आणि इलेक्ट्रॉनिक वस्तू जप्त केल्या आहेत. मागील तीन दिवसांपासून एनआयएचं पथक पुण्यात तपास करत असून, अटक केलेल्या आरोपीची कसून चौकशी केली जात आहे. संबंधित चौकशीतून अनेक धक्कादायक माहिती उघड होण्याची शक्यता सूत्रांकडून वर्तवण्यात येत आहे.
तल्हा लियाकत खान असं अटक केलेल्या 38 वर्षीय संशयित आरोपीचं नाव असून, तो पुण्यातील वानवडी परिसरात वास्तव्याला होता. आरोपी तल्हा खान याचं जागतिक दहशतवादी संघटना इसिसशी संबंध असल्याची गुप्त माहिती राष्ट्रीय तपास यंत्रणेला मिळाली होती. त्यानुसार पोलिसांनी आरोपी तल्हा खान याच्या वानवडी येथील घरावर छापेमारी केली आहे.