शिवभक्तांच्या सुरक्षेसाठी दीड हजार पोलिसांचा बंदोबस्त
| रायगड | जिल्हा प्रतिनिधी |
छत्रपती शिवाजी महाराजांच्या शिवराज्याभिषेक सोहळ्याची तयारी अंतिम टप्प्यात पोहोचली असून, 6 जून रोजी किल्ले रायगडावर होणाऱ्या या ऐतिहासिक सोहळ्यासाठी पोलीस आणि आरोग्य प्रशासनाने व्यापक नियोजन केले आहे. दोन लाखांहून अधिक शिवप्रेमी रायगडावर दाखल होण्याची शक्यता लक्षात घेऊन त्यांच्या सुरक्षेसह आरोग्य सुविधांसाठी संपूर्ण यंत्रणा सज्ज करण्यात आली आहे. सोहळ्यासाठी सुमारे दीड हजार पोलिसांचा बंदोबस्त तैनात करण्यात येणार असून, 247 रुग्णवाहिका सेवा, विशेष वैद्यकीय पथके आणि मुबलक औषधसाठाही उपलब्ध ठेवण्यात आला आहे.
शिवराज्याभिषेक सोहळ्यानिमित्त छत्रपती शिवाजी महाराजांचे दर्शन घेण्यासाठी राज्याच्या विविध भागांतून शिवभक्त रायगडाकडे रवाना होऊ लागले आहेत. काही शिवप्रेमी गडावर दाखल झाले असून, अनेक जण आदल्या दिवसापासून रायगडावर पोहोचणार आहेत. दरवर्षीप्रमाणे यंदाही मोठ्या प्रमाणात गर्दी होणार असल्याने रायगड पोलिसांनी सुरक्षा आणि वाहतूक व्यवस्थेचे विशेष नियोजन केले आहे.
शिवभक्तांचा प्रवास सुखकर आणि सुरक्षित व्हावा यासाठी महत्त्वाच्या मार्गांवर वाहतूक पोलीस तैनात करण्यात येणार आहेत. शंभरहून अधिक एसटी बस तसेच खासगी वाहनांद्वारे शिवभक्त रायगडावर पोहोचणार असल्याने वाहतूक कोंडी टाळण्यासाठी महाड आणि माणगाव या दोन्ही बाजूंना स्वतंत्र वाहनतळ उभारण्यात आले आहेत. दुचाकी, चारचाकी आणि बस यांच्यासाठी स्वतंत्र पार्किंग व्यवस्था करण्यात आली असून त्यासाठी 60 हून अधिक वाहतूक पोलिसांची नियुक्ती करण्यात आली आहे.
रायगड जिल्ह्यातील पोलीस दलासोबतच बाहेरील जिल्ह्यांतूनही अतिरिक्त पोलीस बंदोबस्त मागविण्यात आला आहे. सीआरपीएफ जवान, शीघ्र कृती दल आणि अन्य सुरक्षा यंत्रणा गड परिसरासह महत्त्वाच्या ठिकाणी तैनात राहणार आहेत. लाखो शिवभक्तांच्या सुरक्षेच्या दृष्टीने प्रत्येक हालचालीवर बारकाईने लक्ष ठेवले जाणार असल्याचे पोलीस प्रशासनाने स्पष्ट केले आहे.
दरम्यान, सध्या जाणवत असलेल्या तीव्र उष्णतेच्या पार्श्वभूमीवर आरोग्य विभागानेही विशेष खबरदारी घेतली आहे. उन्हाचा तडाखा, उष्माघात, चक्कर येणे, थकवा, निर्जलीकरण तसेच पाय घसरून होणाऱ्या किरकोळ दुखापतींची शक्यता लक्षात घेऊन जिल्हा परिषद आरोग्य विभागाने गडावर आणि पायथ्याशी विशेष वैद्यकीय सेवा उभारल्या आहेत.
शिवराज्याभिषेक सोहळ्यादरम्यान दोन दिवसांसाठी एकूण 13 विशेष वैद्यकीय पथके कार्यरत राहणार आहेत. रायगड किल्ला आणि परिसरातील विविध महत्त्वाच्या ठिकाणी तात्पुरती वैद्यकीय मदत केंद्रे उभारण्यात येत असून, प्रशिक्षित डॉक्टर, परिचारिका, समुदाय आरोग्य अधिकारी आणि पॅरामेडिकल स्टाफ यांची नियुक्ती करण्यात आली आहे. कोणतीही आपत्कालीन परिस्थिती उद्भवल्यास तात्काळ उपचार मिळावेत यासाठी गडाच्या पायथ्याशी आणि प्रमुख मार्गांवर 24 तास रुग्णवाहिका तैनात ठेवण्यात येणार आहेत.
तसेच सर्व प्राथमिक आरोग्य केंद्रांमध्ये जीवनरक्षक औषधे, आवश्यक लसी आणि वैद्यकीय साहित्याचा पुरेसा साठा उपलब्ध करून देण्यात आला आहे. प्रत्येक वैद्यकीय केंद्रावर पिण्याच्या पाण्याची सोय करण्यात आली असून, शिवभक्तांना आवश्यक आरोग्य सुविधा तत्काळ उपलब्ध होतील यासाठी आरोग्य यंत्रणा सज्ज ठेवण्यात आली आहे.
शिवराज्याभिषेक सोहळ्याच्या पार्श्वभूमीवर सुरक्षा, वाहतूक आणि आरोग्य व्यवस्थेचे त्रिस्तरीय नियोजन करण्यात आले असून, लाखो शिवभक्तांचा उत्सव सुरक्षित, शिस्तबद्ध आणि उत्साहात पार पडावा यासाठी प्रशासनाने सर्व तयारी पूर्ण केली आहे.
अशी असणार विशेष वैद्यकीय पथके
जिल्हा परिषद आरोग्य विभागामार्फत नियुक्त करण्यात आलेल्या प्रत्येक पथकात एक वैद्यकीय अधिकारी, एक समुदाय आरोग्य अधिकारी आणि एक आरोग्यसेवक यांचा समावेश असणार आहे. ही पथके कोंझर पार्किंग, वाय जंक्शन, चित्त दरवाजा, चित्त दरवाजा ते महादरवाजा मार्ग, महादरवाजा, वालसुरे पार्किंग, पाचाड धर्मशाळा, नाणे दरवाजा, शिवसृष्टी पार्किंग (पाचाड गाव), कवळीचा माळ, मदारी मेहतर ते महादरवाजा मार्ग, प्राथमिक आरोग्य केंद्र पाचाड ओपीडी तसेच राखीव पथक अशा एकूण 13 ठिकाणी तैनात राहून आरोग्य सेवा पुरविणार आहेत.