उद्या रायगडावर शिवराज्याभिषेक सोहळा

शिवभक्तांच्या सेवेसाठी प्रशासन सज्ज

| रायगड | जिल्हा प्रतिनिधी |

हिंदवी स्वराज्याचे संस्थापक छत्रपती शिवाजी महाराज यांच्या शिवराज्याभिषेक सोहळ्याचा ऐतिहासिक सोहळा शनिवारी (दि. 6) किल्ले रायगडावर मोठ्या उत्साहात साजरा केला जाणार आहे. या सोहळ्यासाठी राज्यभरातून लाखो शिवभक्त रायगडावर दाखल होणार असल्याने त्यांच्या सुरक्षेसह आरोग्याच्या दृष्टीने पोलीस प्रशासन आणि आरोग्य विभागाने कंबर कसली आहे. सुमारे दीड हजार पोलीस अधिकारी व कर्मचारी, होमगार्ड जवान, स्वयंसेवक तसेच आरोग्य विभागाचे कर्मचारी शिवभक्तांच्या सेवेसाठी सज्ज झाले आहेत.

सध्या राज्यात तीव्र उष्णतेची लाट जाणवत असल्याने रायगडावर येणाऱ्या शिवभक्तांच्या सोयीसाठी जिल्हा परिषदेच्या आरोग्य विभागाने विशेष नियोजन केले आहे. गडावर तसेच पायथ्याशी विशेष वैद्यकीय पथके, 24 तास कार्यरत रुग्णवाहिका आणि मुबलक औषधसाठ्यासह आरोग्य यंत्रणा सज्ज ठेवण्यात आली आहे. शिवराज्याभिषेक सोहळ्यादरम्यान 13 विशेष वैद्यकीय पथके कार्यरत राहणार असून, रायगड परिसरातील विविध ठिकाणी तसेच पाचाड येथील राजमाता जिजाऊ समाधी परिसरात तात्पुरती वैद्यकीय मदत केंद्रे उभारण्यात आली आहेत.

आपत्कालीन परिस्थितीचा सामना करण्यासाठी गडाच्या पायथ्याशी आणि प्रमुख मार्गांवर रुग्णवाहिका 24 तास तैनात ठेवण्यात आल्या आहेत. शिवभक्तांना आरोग्यविषयक कोणतीही अडचण निर्माण झाल्यास तात्काळ उपचार मिळावेत यासाठी डॉक्टर, परिचारिका आणि पॅरामेडिकल स्टाफची नियुक्ती करण्यात आली आहे. प्रत्येक वैद्यकीय केंद्रावर पिण्याच्या पाण्याचीही विशेष व्यवस्था करण्यात आली आहे. दरम्यान, महाड आणि माणगाव मार्गे येणाऱ्या शिवभक्तांची गैरसोय होऊ नये तसेच वाहतूक कोंडी टाळण्यासाठी प्रशासनाने स्वतंत्र पार्किंग व्यवस्था केली आहे. बस, चारचाकी आणि दुचाकी वाहनांसाठी वेगवेगळी पार्किंग स्थळे निश्चित करण्यात आली आहेत. अनेक शिवभक्त शुक्रवारीच रायगडावर दाखल झाले असून, शनिवारी सकाळपासून आणखी मोठ्या संख्येने शिवभक्त गडावर पोहोचणार आहेत.

लाखो शिवभक्तांच्या उपस्थितीच्या पार्श्वभूमीवर रायगडावर कडेकोट पोलीस बंदोबस्त तैनात करण्यात आला आहे. पायथ्यापासून गडाच्या माथ्यापर्यंत ठिकठिकाणी पोलीस कर्मचारी तैनात असून, रायगड पोलिसांसह इतर जिल्ह्यांतील पोलीस अधिकारी, कर्मचारी, होमगार्ड जवान आणि विविध संस्थांचे स्वयंसेवक सेवेत सहभागी झाले आहेत.

शिवभक्तांच्या सेवेसाठी 75 एसटी बसेस
शिवराज्याभिषेक सोहळ्यासाठी मोठ्या संख्येने रायगडावर येणाऱ्या शिवभक्तांचा प्रवास सुखकर आणि सुरक्षित व्हावा यासाठी महाराष्ट्र राज्य मार्ग परिवहन महामंडळाच्या रायगड विभागाकडून विशेष बससेवा सुरू करण्यात आली आहे. शुक्रवारी 75 बसेस सोडण्यात आल्या असून, शनिवारीही आणखी 75 बसेसची व्यवस्था करण्यात आली आहे. शिवभक्तांची ने-आण सुरळीत व्हावी यासाठी महाड, रोहा, श्रीवर्धन आणि माणगाव आगारांतून या बसेस सोडण्यात येणार असल्याची माहिती एसटी प्रशासनाने दिली आहे.