राजिप प्राथमिक शिक्षण विभागाला रिक्त पदांचे ग्रहण

विस्तार अधिकारी ते शिक्षक अशी 971 पदे रिक्त; 92 शाळा मुख्याध्यापकांविना सुरु

| रायगड | सुयोग आंग्रे |

केंद्र आणि राज्य शासनाचा शिक्षण विभाग गुणवत्तापूर्ण शिक्षणासाठी नवनवीन प्रयोग करीत असते. शिक्षणमंत्री ते शिक्षक साऱ्यांनाच राबविले जाणारे शैक्षणिक उपक्रम यशस्वी करण्यासाठी धडपड करण्याचे दिव्य उचलावे लागते. एकीकडे नियमित शिक्षण आणि दुसरीकडे शैक्षणिक उपक्रम यामध्ये शिक्षकांची दमछाक होत असल्याचे चित्र सर्वत्र पाहावयास मिळते. रायगड जिल्हा परिषद शिक्षण विभागाची काही वेगळी कथा नाही. विद्यार्थ्यांना ज्ञानाधिष्ठित करण्यासाठी लागणारे शिक्षक ते जिल्ह्याचा शैक्षणिक आलेख उंचावण्याची जबाबदारी असणारे विस्तार अधिकारी अशी तब्बल 971 पदे रायगड जि.प.च्या प्राथमिक शिक्षण विभागातील आहेत. या रिक्त पदांमुळे आपसूकच असणाऱ्या अधिकारी आणि शिक्षकांवर कामाचा अधिकच ताण पडत असल्याचे चित्र जिल्ह्यात आहे.

रा.जि.प.च्या प्राथमिक शिक्षण विभागामध्ये सक्षम शिक्षणाधिकारी आणि उपशिक्षणाधिकारी यांच्या मार्गदर्शनाखाली प्राथमिक शाळांमधील शैक्षणिक गुणवत्ता वाढावी आणि टिकून राहावी यासाठी प्रयत्न केले जात आहेत. त्यांचे प्रयत्न यशस्वी होत असले तरी प्राथमिक शिक्षण विभागाकडे मंजूर असणाऱ्या पदांपैकी रिक्त असणाऱ्या पदांमुळे लक्ष वेधले जात आहे. रा.जि.प.च्या शिक्षण विभागाकडे 6 हजार 729 पदे मंजूर आहेत. या मंजूर पदांच्या अनुषंगाने 5 हजार 758 पदांची भरती करण्यात आली आहे. असे असले तरी अद्यापही 971 पदे रिक्त असल्याची आकडेवारी समोर आली आहे.

जि.प.च्या शिक्षण विभागामध्ये मंजूर असणाऱ्या 6 हजार 729 पदांमध्ये विस्तार अधिकारी श्रेणी 2 वर्ग 3 ची 15 पदे मंजूर आहेत. त्यामध्ये 10 पदे सरळ सेवा आणि 5 पदे पदोन्नतीने भरण्याचे आदेश आहेत. स्पर्धा परीक्षांमधून आलेल्या विस्तार अधिकारी श्रेणी 2 वर्ग 3 मधील 5 पदे मांजर आहेत. ही सर्व पदे सरळ सेवेतून भरली जाणार आहेत. विस्तार अधिकारी श्रेणी 3 वर्ग 3 मधील 41 पदे मंजूर आहेत. ही सर्व पदे पदोन्नतीने भरली जाणारी आहेत. केंद्रप्रमुखांची 228 पदे मंजूर असून, 114 पदे सरळ सेवा आणि 114 पदे पदोन्नतीने भरली जाणारी आहेत. मुख्याध्यापकांची 114 पदे मंजूर असून, ही सर्व पदे पदोन्नतीने भरली जाणार आहेत. प्राथमिक शिक्षकांची 6 हजार 326 पदे मंजूर असून, ही सर्व पदे सरळ सेवेतून भरली जाणारी आहेत.

जिल्हा परिषदेच्या शिक्षण विभागाकडे मंजूर असणारी 6 हजार 729 पदे असली तरी त्यापैकी 5 हजार 758 पदे भरण्यात आली आहेत. यामध्ये विस्तार अधिकाऱ्यांची श्रेणी 2 वर्ग 3 ची 12 पदे सरळ सेवेतून, तर श्रेणी 3 वर्ग 3 ची 3 पदे पदोन्नतीमधून भरण्यात आली आहेत. केंद्रप्रमुखांची 83 पदे पदोन्नतीने भरण्यात आली आहेत. मुख्याध्यापकांचीदेखील 22 पदे पदोन्नतीने भरण्यात आली आहेत. प्राथमिक शिक्षकांची 5 हजार 638 पदे सरळ सेवेतून भरण्यात आली आहेत. यामध्ये 5 हजार 650 पदे सरळ सेवेने आणि 108 पदे पदोन्नतीने भरण्यात आली आहेत.

रिक्त पदांची संख्या लक्ष वेधणारी
रायगड जिल्हा परिषदेच्या शिक्षण विभागामधील मंजूर आणि भरलेल्या पदांच्या तुलनेत डोळे विस्फारायला लावणारी रिक्त पदांची संख्या आहे. रिक्त असणाऱ्या पदांची संख्या 971 आहे. त्यामध्ये विस्तार अधिकारी श्रेणी 2 वर्ग 3 मधील पदोन्नतीने भरली जाणारी 3 पदे रिक्त आहेत. विस्तार अधिकारी श्रेणी 2 वर्ग 3 स्पर्धात्मक परीक्षांमधून म्हणजेच सरळसेवा भरतीमधून भरली जाणारी 5 पदे रिक्त आहेत. विस्तार अधिकारी श्रेणी 3 वर्ग 3ची पदोन्नतीने भरली जाणारी 38 पदे रिक्त आहेत. केंद्रप्रमुखांची सरळसेवेतून भरली जाणारी 114, तर पदोन्नतीने भरली जाणारी 31 पदे अशी एकूण 145 केंद्रप्रमुखांची पदे रिक्त आहेत. पदोन्नतीने भरली जाणारी मुख्याध्यपकांची 92 पदे रिक्त आहेत. प्राथमिक शिक्षकांची सरळसेवेतून भरली जाणारी 688 पदे रिक्त आहेत. 971 रिक्त असणाऱ्या पदांमध्ये 805 पदे सरळसेवेतून आणि 166 पदे पदोन्नतीने भरण्याचे शिवधनुष्य जिल्हा परिषदेला उचलावे लागणार आहे.