रामकृष्ण ठरला विजयाचा शिल्पकार

| मुंबई | वृत्तसंस्था |

विजय हजारे ट्रॉफी 2025-26च्या एलिट ग्रुप सी मधील एका हाय-व्होल्टेज सामन्यात महाराष्ट्राने शेवटच्या षटकांत झालेल्या रोमांचक सामन्यात गोव्याचा 5 धावांनी पराभव करून सर्वांना चकित केले. हा सामना खऱ्या अर्थाने गोलंदाजाची परीक्षा होती.

महाराष्ट्राचा अष्टपैलू खेळाडू रामकृष्ण घोष याने शेवटच्या षटकात उत्कृष्ट कामगिरी करत आपल्या संघाचा विजय निश्चित केला. रामकृष्ण घोषच्या जादुई गोलंदाजीने महाराष्ट्राने गोव्याकडून सहज विजय हिसकावून घेतला. रामकृष्ण घोषच्या सहा जादुई चेंडूंमुळे गोवा संघ लक्ष्यापासून फक्त पाच धावांनी दूर राहिला. सामन्याचा खरा नाट्यमय क्षण शेवटच्या षटकात उलगडला. गोव्याला जिंकण्यासाठी फक्त सहा धावांची आवश्यकता होती, एक विकेट शिल्लक होती. या महत्त्वाच्या क्षणी, रामकृष्ण घोषने गोलंदाजीला सुरुवात केली. घोषने दबावाखाली उत्कृष्ट नियंत्रण ठेवले आणि संपूर्ण षटकात एकही धाव दिली नाही. मेडन ओव्हर टाकत त्याने महाराष्ट्राला पाच धावांनी संस्मरणीय विजय मिळवून दिला. रामकृष्ण घोषने 10 षटकांत फक्त 35 धावा दिल्या आणि एक गडी घेतला.

सामन्यात महाराष्ट्राने प्रथम फलंदाजी करताना 50 षटकांत 7 गडी गमावून 249 धावा केल्या. यामध्ये ऋतुराज गायकवाडचे शतक होते. ऋतुराज गायकवाडने कर्णधारपदाला साजेशी 134 धावांची खेळी केली. तर विकी ओस्तवालने 53 धावांचे योगदान दिले. प्रत्युत्तरादाखल गोव्याने दमदार सुरुवात केली. कश्यप बखले आणि स्नेहल कौथनकर यांनी पहिल्या विकेटसाठी 83 धावा जोडल्या. पण त्यानंतर डाव डळमळीत झाला आणि संघाने 221 धावांत 9 गडी गमावले. नंतर ललित यादवने गोव्याचा डाव सावरला आणि त्याने 67 चेंडूत नाबाद 57 धावा केल्या.वासुकी कौशिकनेही त्याला साथ दिली. पण ही जोडी संघाला विजय मिळवून देऊ शकली नाही. रामकृष्ण घोष आयपीएल 2025 मध्ये चेन्नई सुपर किंग्जकडून खेळताना दिसतील. रामकृष्ण घोष आयपीएल 2025 च्या आधी सीएसके संघात सामील झाले आणि चेन्नई सुपर किंग्जने लिलावात त्याच्यावर 30 लाख रुपये खर्च केले. तथापि, त्याला एकही सामना खेळण्याची संधी मिळाली नाही. तरीही, त्याला आयपीएल 2026 साठी कायम ठेवण्यात आले. संघ व्यवस्थापनाचा हा विश्वास या वर्षी फायदेशीर ठरू शकतो आणि तो आयपीएलमध्ये पदार्पण करताना दिसू शकतो.