रवींद्र-कॉन्वेचा शतकी तडाखा

न्यूझीलंडकडून इंग्लंडचा दारुण पराभव

| अहमदाबाद | वृत्तसंस्था |

विश्वषकाच्या पहिल्याच सामन्यात गतउपविजेत्या न्यूझीलंडने गतविजेत्या इंग्लंडचा नऊ गडी आणि 82 चेंडू राखून पराभव केला. न्यूझीलंडच्या गोलंदाजांनी आधी इंग्लंडच्या फलंदाजांना रोखले, त्यानंतर फलंदाजांनी इंग्लंडची गोलंदाजी फोडून काढली. इंग्लंडने दिलेले 283 धावांचे आव्हान न्यूझीलंडने सहज पार केले. न्यूझीलंडकडून सलामी फलंदाज डेवेन कॉन्वे याने दीडशतक ठोकले, तर युवा फलंदाज रचित रवींद्रने वादळी शतकी खेळी केली.

इंग्लंडने दिलेल्या 283 धावांच्या आव्हानाचा पाठलाग करताना न्यूझीलंडची सुरुवात अतिशय खराब झाली. संघाच्या अवघ्या दहा धावा झाल्या तेव्हा सलामी फलंदाज विल विंग शून्यावर तंबूत परतला होता. पण, युवा फलंदाज रचित रवींद्र याने डेवेन कॉन्वेला चांगली साथ दिली. दोघांनी इंग्लंडच्या फलंदाजांचा समाचार घेतला. दोघांनी 273 धावांची विक्रमी भागिदारी करत न्यूझीलंडला विजय मिळवून दिला.

डेवेन कॉन्वे याने 121 चेंडूंत वादळी 152 धावांची खेळी केली. या खेळीमध्ये कॉन्वे याने तीन षटकार आणि 19 चौकार लगावले. तर, रचित रवींद्र याने 96 चेंडूंत झंझावाती 123 धावांची शतकी खेळी केली. या शतकी खेळीत रचित रवींद्रने 11 चौकार आणि पाच षटकार ठोकले. रचित आणि कॉन्वे यांच्या वादळी फलंदाजीपुढे इंग्लंडच्या गोलंदाजांनी लोटांगण घेतले होते. इंग्लंडचा एकही गोलंदाज या जोडीपुढे टिकला नाही. ख्रिस वोक्स, मार्क वूड, मोईन अली, अदिल रशीद, लियाम लिव्हिंगस्टोन सर्वांचाच समाचार घेतला. इंग्लंडकडून फक्त सॅम करनला एकमेव गडी बाद करता आला.