शिवस्मारकात पक्षविरहीत नोकर भरती करा

जासई सरपंच संतोष घरत यांची मागणी

| उरण | वार्ताहर |
जासई ग्रुप ग्रामपंचायत हद्दीतील शिवस्मारक हे लाखो भाविकांचे श्रद्धास्थान आहे.अशा शिवस्मारकातील नोकर भरती प्रक्रियेत पक्षविरहित नोकर भरती करुन स्थानिक प्रकल्पग्रस्त तरुणांना नोकरीत सामावून घेण्यात यावे, अशी मागणी जासई ग्रुप ग्रामपंचायतीचे सरपंच संतोष घरत यांनी जेएनपीए बंदर प्रशासनाकडे केली आहे. तसे न झाल्यास जेएनपीए विरोधात आंदोलन करण्याचाही इशारा त्यांनी दिला आहे.

जासई ग्रुप ग्रामपंचाय हद्दीत जेएनपीए बंदर प्रशासनाने लाखो भाविकांचे श्रध्दास्थान असलेल्या शिवस्मारकांची उभारणी केली आहे. या शिवस्मारकांचे उद्घाटन डॉ. आप्पासाहेब धर्माधिकारी यांच्या हस्ते करण्यात आले. अशा शिवस्मारकाच्या देखरेखीसाठी, कामकाजासाठी नोकर भरती केली जात आहे. यामध्ये ठराविक पक्षातील तरुणांनाच नोकर भरती प्रक्रियेत सामावून घेतले जात आहे. त्यामुळे इतर पक्षांतील तरुणांवर, प्रकल्पग्रस्तांवर अन्याय होत आहे.

लोकनेते दि.बा. पाटील यांनी या परिसरातील प्रकल्पांमधील नोकर भरती प्रक्रियेत केव्हाच राजकारण केले नाही. त्यामुळे त्यांचा आदर्श डोळ्यासमोर ठेवून शिवस्मारकातील नोकर भरती प्रक्रियेत सर्वच पक्षांच्या तरुणांना, प्रकल्पग्रस्तांना विश्‍वासात घेऊन सामावून घेण्याची मागणी करण्यात आली आहे. तशा प्रकारच्या सूचना जेएनपीए बंदराचे चेअरमन संजय शेठी, व्हा. चेअरमन उमेश वाघ तसेच प्रशासकीय अधिकारी जयवंत ढवळे यांनी संबंधित ठेकेदाराला दिले असताना त्या सूचनेची, आदेशाची अंमलबजावणी मुजोर ठेकेदार करत नसल्याने अनेक प्रकल्पग्रस्तांवर अन्याय आहे. या अन्यायाविरुद्धविरोधात जेएनपीए बंदर प्रशासनावर जनआंदोलन उभारण्यात येईल, असा इशारा जासई सरपंच संतोष घरत यांनी दिला आहे.