| गुहागर | प्रतिनिधी |
गुहागर तालुक्यातील पाटपन्हाळे विविध कार्यकारी सोसायटीच्या गोदामात खताच्या गोणींमध्ये वेटोळा करुन बसलेल्या महाकाय अजगराला शृंगारतळी येथील सर्पमित्राने पकड़ून त्याला नैसर्गिक अधिवासात सोडले आहे.
पाटपन्हाळे विविध कार्यकारी सोसायटीचे गोदाम शृंगारतळी अर्बुदा स्टील सेंटरच्या समोर आहे. या गोदामात सध्या खताच्या गोणी आहेत. या खताचे वाटप करावयाचे असल्याने गोदातामतील गोणी बाहेर काढण्यासाठी कर्मचारी विनायक जोशी, सचिन कदम व प्रमोद चव्हाण हे गेले होते. गोणी काढत असताना वेटोळा करुन बसलेला सुमारे 6 फुटी अजगर त्यांनी पाहिला. त्यांनी शृंगारतळी येथील सर्पमित्र अरमान मुजावर यांना तातडीने बोलावले. मुजावर यांनी त्याला आपल्या कौशल्याने पकडले व नैसर्गिक अधिवासात मुक्त केले.