माथेरान घाट आणखी सुरक्षित होणार

माजी नगराध्यक्ष प्रेरणा सावंत यांचा पाठपुरावा
साडेसहा किलोमीटर रस्त्याचे नूतनीकरण

| नेरळ | प्रतिनिधी |

माथेरान या पर्यटनस्थळी येणाऱ्या पर्यटकांसाठी नेरळ-माथेरान घाट हा एकमेव रस्ता मार्ग आहे. या घाट रस्त्याचे नूतनीकरण राज्य सरकारच्या एमएसआयडीसी यांच्या माध्यमातून सुरू आहे. या रस्त्यासाठी माथेरानच्या माजी नगराध्यक्ष प्रेरणा सावंत यांनी पाठपुरावा सुरू ठेवला होता.

माथेरान येथे येणारे पर्यटक आणि स्थानिक टॅक्सीचालकांसाठी काळजीचा विषय बनलेला नेरळ-माथेरान घाटरस्ता सध्या अत्यंत धोकादायक बनला आहे. अरुंद वळणे, ठिकठिकाणी पडलेले मोठे खड्डे आणि दरड कोसळल्याने या रस्त्यावर वारंवार अपघात घडत आहेत. मुंबई महानगर प्रदेश प्राधिकरणकडून बांधण्यात आलेल्या या रस्त्याची नूतनीकरण आता एसआयडीसी करणार आहे. या कामाची पाहणी या विभागाचे कार्यकारी अभियंता यांनी केली. त्यावेळी या रस्त्यासाठी गेली 8 वर्षे पाठपुरावा करणाऱ्या माथेरानच्या माजी नगराध्यक्ष प्रेरणा सावंत यांच्यासह माथेरान पालिकेचे विरोधी पक्ष नेते सीताराम कुंभार, नगरसेविका अनिता रांजणे तसेच ढेबे माथेरान नागरी पतसंस्थेचे तज्ज्ञ संचालक गिरीश पवार आदी उपस्थित होते. यावेळी रस्त्याच्या बाजूला असलेल्या गटारात मोठंमोठ्या दगडी पडल्याचे आणि अनेक ठिकाणी मोठ्या प्रमाणात मातीचा भराव साचल्याचे दिसून आले. वळणांवर पडलेल्या खड्ड्यांमुळे वाहनचालकांना गाडी चालवणे अवघड जात असल्याचे निदर्शनास आले. या अधिकाऱ्यांनी सांगितले की, रस्त्यावरील दगड, माती तातडीने साफ करून घेण्यात येईल. तसेच, वळणावरील खड्डे बुजवून रस्ता दुरुस्त केला जाईल. पाणी जाण्यासाठी जागा नसल्याने खड्डे पडत आहेत, त्यामुळे गटारांची सफाई प्राधान्याने केली जाणार आहे. गेल्या 10 वर्षांपासून हा रस्ता सार्वजनिक बांधकाम विभागाकडे होता. मात्र, बांधकाम खात्याकडून योग्य देखभाल न झाल्याने रस्त्याची दुरवस्था झाली. आता हा रस्ता एमएसआयडीसीकडे आला असून, अधिकाऱ्यांनी संपूर्ण रस्त्याची पाहणी केली आहे.

पावसाळा तोंडावर आल्याने सुरुवातीला तातडीची कामे करून रस्ता सुरक्षित केला जाईल, असे अधिकाऱ्यांनी स्पष्ट केले. भविष्यात परवानगी मिळाल्यानंतर संपूर्ण रस्त्याचे व्यवस्थित काम केले जाईल, असे आश्वासनही देण्यात आले. पर्यटकांच्या आणि स्थानिक नागरिकांच्या सुरक्षेसाठी हा घाटरस्ता लवकरात लवकर व्यवस्थित करावा, अशी मागणी माथेरानकरांनी केली आहे. त्यानुसार संबंधित रस्त्याच्या कामाचा ठेका मिळवणाऱ्या ठेकेदाराने कामाला सुरुवात केली आहे. साधारण साडेसहा किलोमीटर लांबीचा रस्ता तयार केला जाणार आहे.