एसटी स्टँड मधील प्रसाधनगृह बंद

| रोहा | प्रतिनिधी |

सेफ्टी टँक ओव्हरफ्लो झाल्याने रोहा एस.टी. स्टँडमधील प्रसाधनगृह (सार्वजनिक शौचालय व मुतारी) अनेक दिवसांपासून बंद असल्याने येथील प्रवासी वर्ग, नागरिक, शाळकरी विद्यार्थी विद्यार्थिनींची गैरसोय होत आहे. विशेष म्हणजे सध्या उत्सवांचे दिवस सुरू असताना ही समस्या अधिक गंभीर बनली आहे. या विषयी शहरातील समाजसेवक बिलाल मोरबेकर यांनी आक्रमक भूमिका घेत संबधित प्रशासनाला लेखी निवेदन देत तातडीने प्रसाधन गृह तातडीने सुरू करण्याची मागणी केली आहे.

एसटी स्टँडमधील प्रसाधन गृह बंद असल्याबाबत प्रवाशी व नागरिकांनी एसटी स्टँड येथील अधिकाऱ्यांकडे तक्रार केली. मात्र, या तक्रारीकडे संबधित अधिकाऱ्यांनी कानाडोळा केल्याने अखेर जनतेचा आवाज बनून समाजसेवक बिलाल मोर्बेकर यांनी आगार व्यवस्थापक प्रकाश शेलार यांना भेटून लेखी निवेदन देत शौचालय तातडीने सुरू करण्याची मागणी केली आहे. एसटी स्टँडमधील प्रसाधन गृह बंद असल्याने प्रवाशी, नागरिकांची व दुरून येणाऱ्या शाळकरी मुला-मुलींची गैरसोय होत आहे. सार्वजनिक शौचालय हे सुविधा नसून नागरिकांची मूलभूत गरज आहे. नागरिकांनी तक्रार केल्यानंतरही दुरुस्ती होत नसेल तर शौचालय बांधलेच कशाला असा सवाल बिलाल मोरबेकर यांनी केला आहे.